Jambylda toı ústinde aspanǵa oq atqan azamat – polıtsııa qyzmetkeri emes - departament
Áleýmettik jelilerde polıtsııa qyzmetkeri óz toıynda aspanǵa qarýdan oq atty degen aqparat taraǵan bolatyn. Atalǵan derek boıynsha Jambyl oblysynyń polıtsııa departamenti Qylmystyq kodekstiń 293-baby 3-bóligimen sotqa deıingi tergeý amaldaryn bastady.
Tergeý barysynda oq atqan azamattyń 28 jastaǵy ýaqytsha jumyssyz, Taraz qalasynyń turǵyny ekendigi anyqtalyp, onyń polıtsııa qyzmetkeri emestigi jáne buryn ishki ister organdarynda jumys istemegeni belgili boldy.
Oq atylǵan «Saıga» ańshy myltyǵy zań júzinde osy azamattyń atyna tirkelgeni jáne 2021 jyldyń 1 maýsymynda ony alyp júrýge ruqsat berilgeni de anyqtaldy. Qarý tárkilenip, sot-ballıstıkalyq saraptama taǵaıyndaldy. Kúdikti sot sheshimimen úı qamaqqa alyndy. Kinási dáleldengen jaǵdaıda 3 jyldan 7 jylǵa deıin bas bostandyǵynan aıyrý túrindegi jaza qarastyrylady.
Foto: polisia.kz