Jambylda tótenshe jaǵdaı aıaqtalsa da, terrorızm qaýpiniń «qyzyl» deńgeıi saqtalady

TARAZ. QazAqparat – Jambyl oblysynda tótenshe jaǵdaı rejımi toqtatylǵanyna qaramastan terrorıstik qaýiptiliktiń «qyzyl» deńgeıi saqtalady, dep habarlaıdy QazAqparat tilshisi.

Óńirde terrorızmge qarsy operatsııalar aıaqtalǵan joq. Bul týraly terrorızmge qarsy kúres jónindegi Jambyl oblystyq jedel shtaby habarlady.

Shtabtyń málimetinshe, terrorızmge qarsy is-sharalar boıynsha kúzet, izdestirý, anyqtaý sharalary jáne blok-beketterdiń jumysy jalǵasýda.

«Terrorıstik qaýiptiń «qyzyl» deńgeıinde quqyq qorǵaý organdaryna birqatar áreketke jol beriledi, onyń ishinde jeke tekseris jáne azamattardyń zattaryn, kólikterin qaraý, sondaı-aq, olardyń qozǵalysyn ýaqytsha shekteý nemese tyıym salý qarastyrylady. Sondaı-aq, sherýler men mıtıngiler ótkizýge tyıym salynady»,-delingen habarlamada.

Quqyq qorǵaý organdary jumysyna túsinistikpen qarap, zań talaptaryn saqtaýdy ótindi.

Terrorızmge qarsy operatsııanyń aıaqtalý merzimi týraly qosymsha habarlanady.