Jambylda tórt aıda 60 bala úıinen ketip qalǵan
TARAZ. QazAqparat – Jambyl oblysynda tórt aıda 60 bala úıinen ketip qalǵan, dep habarlaıdy QazAqparat tilshisi.
Aǵymdaǵy jyldyń 4 aıynyń qorytyndysy boıynsha Jambyl oblysynda kámeletke tolmaǵan balalardyń úıinen ketýiniń 60 deregi tirkeldi, ótken jyldyń osyǵan sáıkes kezeńinen (32 derek) 87,5% - ǵa artyq. Bul kúnderi barlyq jasóspirimder tabylyp, ata-analaryna qaıtaryldy. Olardy izdeýge eriktiler men janashyr azamattar da belsendi qatysqan.
«Jambyl oblysynyń Polıtsııa departamenti ata-analardan qyraǵylyq tanytýdy, balalarynyń bos ýaqytyn jáne dostyq qarym-qatynastaryn uıymdastyryp, qadaǵalaýdy suraıdy. Eresek adamdardyń nemquraılylyǵy kámeletke tolmaǵandarǵa qatysty, sondaı-aq olardyń qatysýymen oryn alatyn zańǵa qaıshy áreketter jasaýǵa sebep bolýy múmkin», - dedi Jambyl oblysynyń Polıtsııa departamenti Krımınaldyq polıtsııa basqarmasynyń bastyǵy Ardaq Madımarov.
