Jambylda til janashyrlary marapattaldy
«Qoǵamdyq kelisim» mekemesiniń ǵımaratynda oblys ákiminiń «Til janashyry» júldesin tabystaý saltanaty ótti. Oǵan aımaq basshysy Asqar Myrzahmetov arnaıy qatysyp, júldegerlerdi quttyqtady.
Oblys ákimdiginiń tilderdi damytý basqarmasynyń uıymdastyrýymen ótken sharaǵa memlekettik tilge shynaıy janashyrlyq tanytyp, tilimizdiń damýyna naqty isimen úles qosyp júrgen jandar qatysty.
Aıta keteıik, atalǵan júlde memlekettik tildiń mártebesin kóterý, týǵan tilge degen jastardyń súıispenshiligin arttyrý maqsatynda taǵaıyndalǵan. Ol boıynsha laýreattardy irikteý konkýrstyq komıssııasyna 20 adam qujat tapsyrǵan. Baıqaý komıssııasy jumysynyń nátıjesinde oblys ákiminiń «Til janashyry» júldesi 7 nomınatsııa boıynsha usynyldy. Jeńimpazdar saltatanatty shara barysynda marapattaldy.
Atap aıtsaq, «Til maıtalmany» nomınatsııasyn M.H.Dýlatı atyndaǵy Taraz memlekettik ýnıversıtetiniń «Dýlatıtaný» ǵylymı-zertteý ortalyǵynyń dırektory, fılologııa ǵylymdarynyń doktory, professor Sámen Qulbaraq, «Til tiregi» nomınatsııasyn oblys boıynsha aýmaqtyq kásipodaqtar birlestiginiń tóraǵasy Meırambek Tólepbergen, «Til jarshysy» nomınatsııasyn respýblıkalyq «Egemen Qazaqstan» gazetiniń oblys boıynsha menshikti tilshisi, Qazaqstan Jazýshylar odaǵy oblystyq fılıalynyń dırektory Hamıt Esaman, «Til saqshysy» nomınatsııasyn «JAMBYL» telearnasynyń tilshisi Danııar Asqaruly jeńip aldy.
Al, Baızaq aýdanyndaǵy Ǵ.Muratbaev atyndaǵy gımnazııanyń bıologııa jáne geografııa pániniń muǵalimi Evgenıı Kravchýk «Til bilgiri», M.H.Dýlatı atyndaǵy TarMÝ «Rýhanı jańǵyrý» jobalyq ofısiniń jetekshisi, fılologııa magıstri Balmıra Myrzabaeva «Til - qazyna», «Jasyl el» eńbek jasaqtarynyń tóraǵasy Álibek Muratbaev «Til mereıi» nomınatsııalaryna laıyq dep tabyldy. Júldegerlerge dıplomdar men 300 myń teńgelik aqshalaı syılyqtar tabystaldy.
