Jambylda taý bókterinde tutanǵan órt táýlik boıy sóndirildi
TARAZ. QazAqparat - Qutqarýshylar Jambyl oblysynyń Rysqulov aýdanynyń taý bókterinde bolǵan tabıǵı órtti bir táýlikten astam ýaqyt boıy sóndirdi, dep habarlaıdy QazAqparat tilshisi Jambyl oblystyq TJD baspasóz qyzmetine silteme jasap.
Jambyl oblysynda aýa raıynyń 40 gradýsqa deıin kóterilip, kúnniń qatty ysyp ketýi óńir aýmaǵyndaǵy qurǵaq shóptiń janýyna sebep bolǵan.
«7 shilde kúni saǵat 17:23-te Rysqulov aýdanynyń Qaıyńdy aýyldyq okrýginiń taý bókterinde qurǵaq shóp órtendi. Kelesi kúni órt Aqyrtóbe ormandar men janýarlar dúnıesin qorǵaý jónindegi memlekettik mekemesiniń ǵımaratyna qarasty «Maqpal» sovhohynyń «Mamaı» bólimshesine deıin jetip, bul aımaq ta jalynǵa oranǵan. Saǵat 1:20-da órt aýyzdyqtalyp, búgin tańǵy 8:00-de túgeldeı sóndirildi», - dedi mekeme ókili.
Jambyl oblysynyń TJD qyzmetkerleri taýly aımaqtardaǵy jer bederiniń erekshelikterine baılanysty mundaǵy órtti sóndirý qıyndyq týǵyzatynyn jetkizdi. Rysqulov aýdanyndaǵy tilsiz jaýmen kúresý úshin basqarmadan, orman sharýashylyǵynan, sondaı-aq, eriktilerden 130 qyzmetker men arnaıy 20 tehnıka jumyldyrylǵan. Órtengen aýmaqtyń kólemi anyqtalýda.
Bir aı buryn dál osy Rysqulov aýdanynda qurǵaq shóp pen aǵash butalary órtke oranyp, ary qaraı Merke aýdanyna oıysqan bolatyn. Ol kezde 100 gektardan astam aýmaqty jalyn sharpyǵan.
