Jambylda syıymdylyǵy elý mıllıon tekshe metrge jýyq 3 sý qoımasy salynady
TARAZ. QazAqparat – Jambyl oblysynda 2021 jylǵa deıin syıymdylyǵy 40,9 mıllıon tekshe metrdi quraıtyn 3 sý qoımasyn salý josparlanýda,- dep habarlaıdy QazAqparat tilshisi.
Aǵymdaǵy jyly josparǵa sáıkes Jambyl oblysy aýmaǵyndaǵy 17,1 myń gektar sýarmaly jer, sondaı-aq «Irrıgatsııalyq jáne drenajdyq júıelerdi jetildirý jobasynyń» - 2 fazasy» respýblıkalyq baǵdarlamasy boıynsha 15,2 myń gektar sýarmaly jer qalpyna keltirilýde. Bul týraly oblys ákimdiginiń aýyl sharýashylyǵy basqarmasynyń basshysy Berik Nyǵmashev aıtyp berdi.
«Sýarmaly jer turaqty sý kózin qajet etedi. Osyǵan oraı sý qoımalarynyń jaǵdaıy da retke keltirilýde. Máselen, «Qaraqońyz», «Tasótkel», «Yntaly» sý qoımalaryna qaıta jańǵyrtý jumystary aıaqtalsa, 44,3 myń gektar jerdi ylǵaldandyrýǵa bolady. Sonymen qatar, atalǵan baǵdarlama aıasynda 2021 jylǵa deıin kólemi 40,9 mıllıon tekshe metrdi quraıtyn 3 sý qoımasyn salý kózdelýde. Atap aıtsaq, Qordaı aýdanyndaǵy Yrǵaıty ózeninde «Yrǵaıty» jáne Qalǵutty ózeninde «Qalǵutty» sý qoımasy, Baızaq aýdanyndaǵy Talas ózeninde «Aqmola» sý qoımasyn salý josparlanýda. Bul sý qoımalarynyń qurylysy aıaqtalǵanda paıdalanýdaǵy 34,5 myń gektar sýarmaly jerdi sýmen qamtamasyz etý deńgeıi artady»,-dedi B.Nyǵmashev.
Basqarma basshysynyń aıtýynsha, ótken jyly aımaqtaǵy aýyl sharýashylyǵy alqaptaryndaǵy sý júıeleri men kanaldardy tazartý jáne qalpyna keltirý jumystaryn turaqty júrgizý maqsatynda «Talas-Asa» sý sharýashylyǵy kásiporny bazasynda oblystyq mehanıkalyq jasaq qurylǵan. Onyń materıaldyq-tehnıkalyq bazasyn nyǵaıtý maqsatynda jergilikti bıýdjetten 423,4 mıllıon teńge bólinip, barlyǵy on jeti birlik melıoratıvtik-qurylys tehnıkalary satyp alynypty. Jalpy, mehanıkalyq jasaqtyń kúshimen 2018-2021 jyldary 388 kılometr sý sharýashylyǵy nysandaryn jóndep, 20 myń gektardan astam sýarmaly alqaptardy qalpyna keltirý kózdelgen. Ótken jyly mehanıkalyq jasaq úsh sý qoımasyna aǵymdaǵy jóndeý jumystaryn jáne jeti kanalǵa mehanıkalyq tazalaý jumystaryn júrgizdi. Sóıtip, oblys kóleminde jalpy uzyndyǵy 26,8 kılometr kanal tazalanyp, 1404 gektar sýarmaly alqap qalpyna keltirildi.
«Bıyl kásiporyn uzyndyǵy 65 shaqyrymdy quraıtyn sý júıelerine aǵymdaǵy jóndeý jumystaryn júrgizip, 4843 gektar sýarmaly alqap qalpyna keltirildi jáne eki jylda jalpy 6247 gektar alqap tolyq sýmen qamtamasyz etildi. Buǵan qosa, qosymsha sýarmaly alqapqa bos jerlerden 4,7 myń gektar sýarmaly alqap qosylmaq. Nátıjesinde 2019-2021 jyldar aralyǵynda barlyǵy 25,8 myń gektar sýarmaly jerler aınalymǵa qosylyp, 86,2 myń gektar tolyq sýmen qamtamasyz etiledi. Osylaısha, jalpy oblys boıynsha sýarmaly alqap 210,6 myń gektarǵa jetkiziledi»,-deıdi basqarma basshysy.
