Jambylda sybaılas jemqorlyqpen kúresý úshin tyń tásil engizilip jatyr
Bul týraly QR Sybaılas jemqorlyqqa qarsy is-qımyl agenttiginiń Jambyl oblysy boıynsha departamenti basshysynyń birinshi orynbasary Ravıl Tólebaev habarlady.
«Keshendi jumystardyń biri – «Integrity Check» engizý. Bul - quqyq qorǵaý jáne baqylaý organdarynyń qyzmetkerlerine qatysty erekshe óndiris aıasynda, ıaǵnı qupııa ádistermen jáne sottyń sanktsııasymen qatań túrde júrgiziletin qyzmettik tekseristiń analogy. Tekserilýshi para, ózge de paıda men artyqshylyqtar alýǵa kelisimin bildirgen jaǵdaıda jumystan bosatylady. Bul rette onyń úsh jyl boıy memlekettik laýazymdardy atqarýyna tyıym salynady»,- deıdi R.Tólebaev.
Osyǵan oraı búgingi kúni departament sybaılas jemqorlyqqa qarsy shekteýler jáne memlekettik qyzmetshilerdiń ádep kodeksiniń talaptary negizinde Parasattylyq shekteýlerin saqtaý kelisimin ázirlegen. Osy parasattylyq kelisim paraǵynda qyzmetkerler óz ókilettigi sheginde birqatar shekteýlerdi qabyldaı alady. Ol boıynsha qyzmetker óz qyzmetin atqarý kezinde qandaı da bir azamat tarapynan syılyq, para usynýǵa qatysty adaldyqty tekserýge óz ruqsatyn beredi.
Eger qyzmetker tekserý kezinde syılyq nemese para alýǵa kelisken jaǵdaıda tártiptik, onyń ishinde qyzmetinen bosatylýǵa deıingi jaýapkershilik qarastyrylǵan.
«Búgingi kúni ishki ister organdary birlesken is-sharalar jospary negizinde kóshi-qon polıtsııasy, patrýl polıtsııasy, tergeýshiler men jedel qyzmettiń 1500-den asa qyzmetkeri parasattylyq shekteýlerdi qabyldady. Bul óz kezeginde sybaılas jemqorlyqty kúrt tómendetýge jáne polıtsııa qyzmetine degen senimdi arttyrady dep esepteımiz», - deıdi atalmysh departament basshysynyń birinshi orynbasary.
