Jambylda sybaılas jemqorlyq jyl saıyn 20 paıyzǵa tómendeýde

TARAZ. QazAqparat – Jambyl oblysynda «ÚEU, sarapshylar qaýymdastyǵynyń sybaılas jemqorlyqqa qarsy mádenıetti qalyptastyrýǵa qatysýyn keńeıtý» taqyrybyndaǵy onlaın-semınar ótti, dep habarlaıdy QazAqparat tilshisi.

Jambyl oblysynyń ákimi Berdibek Saparbaev «Jańarý» sybaılas jemqorlyqqa qarsy jalpyulttyq qozǵalysy» RQB uıymdastyrǵan onlaın-semınarǵa arnaıy qatysty.

Semınardy «Jańarý» RQB tóraǵasy, elimizdiń qoǵam jáne saıası qaıratkeri Oralbaı Ábdikárimov júrgizip otyrdy.

Sybaılas jemqorlyqqa qarsy is-qımyl agenttigi oblys boıynsha departamentiniń basshysy Ádilhan Áshirbaev vedomstvo qoǵamdyq ınstıtýttarmen yntymaqtastyqta jumys júrgizip otyrǵanyn atap ótti. «Nur Otan» partııasy janyndaǵy qoǵamdyq keńesterdiń otyrystary barysynda sybaılas jemqorlyqqa qarsy máseleler kóterilip, bıznes pen ınvestıtsııalardy qorǵaý maqsatynda «Protecting Business and Investments» jobasy qolǵa alynyp, «Satyp alýdyń biryńǵaı terezesi» portaly iske qosylǵan, ol arqyly barlyq adamdarǵa memlekettik organdardyń satyp alý josparlarynan habardar bolýǵa múmkindik bar.

Ádilhan Áshirbaev oblysta sybaılas jemqorlyq quqyq buzýshylyqtarynyń sany jyl saıyn 20 paıyzǵa tómendep otyrǵanyn basa aıtty.

«Jańarý» RQB fılıalynyń basshysy Qasymhan Tólendıev óz sózinde qoǵamda parasattylyq ıdeologııasyn ilgeriletýge baǵyttalǵan «Parasat joly» jobasy boıynsha atqarylyp jatqan jumystarǵa toqtaldy. Jobany júzege aqannan beri oblys boıynsha 190 is-shara ótkizilgen. M.H.Dýlatı atyndaǵy Taraz óńirlik ýnıversıteti men Jambyl polıtehnıkalyq joǵary kolledjiniń bazasyndaǵy 274 kitaphanada «Parasat joly» ortalyqtary ashylǵan.

Sondaı-aq, basqosýda memlekettik qyzmet isteri agenttiginiń oblys boıynsha departament basshysy Sultanhan Shákir de óz oıyn ortaǵa saldy.