Jambylda sý sharýashylyǵy salasyndaǵy 310 nysan qaıta jańǵyrtylady
TARAZ. QazAqparat – Jambyl oblysynda jalpy quny 24,7 mlrd teńge bolatyn sý sharýashylyǵy jáne sý burý júıeleriniń 310 nysany qaıta jańartylatyn bolady. Ol Eýropalyq qaıta qurý jáne damý bankiniń nesıesi negizinde júzege aspaq, dep habarlaıdy QazAqparat oblys ákimdiginiń resmı saıtyna silteme jasap.
Jambyl oblysyna jumys saparymen kelgen QR ekologııa, geologııa jáne tabıǵı resýrstar mınıstri Maǵzum Myrzaǵalıev aımaq basshysy Berdibek Saparbaevpen birge óńirdegi sý sharýashylyǵy salasynda júzege asyrylyp jatqan jobalarmen tanysty.
Aıta keteıik, buǵan óńirde sýarmaly alqaptardyń aýmaǵyn 200 myń gektarǵa deıin ulǵaıtý mindeti qoıylǵan bolatyn. Búgingi tańda onyń kólemi 110 myń gektardy quraıdy. Al, sýarý júıelerin qalpyna keltirý jumystarynan soń bul kórsetkish kem degende 180 myń gektarǵa deıin artady dep kútilýde.
Mınıstr Jambyl aýdanyndaǵy Raıs, Ismaıl magıstraldy kanalyna baılanǵan sý júıelerindegi júrgizilip jatqan qalpyna keltirý jumystaryn kózben kórdi.
«Qazsýshar» RMK fılıalynyń basshysy Qazybek Bedebaev máseleler qatarynda Qaraqońyz sý qoımasynyń syıymdylyǵyn 8,5 mıllıon tekshe metrden 18,5 mıllıonǵa deıin ulǵaıtý, Jasórken aýylyndaǵy gıdrologııalyq bekettiń nashar jaǵdaıy, «Hımpark Taraz»JShS-niń tirek qurylysyn jóndeý qajettigin atap ótti.
- Kanaldardy jóndeýden basqa qudyqtar qazý isi de ózekti. Múmkin bolsa, barlyq qoldanystaǵy kanaldardy betondaý qajet. Bul azdap qymbatqa túskenimen, biraq ol uzaq shydas beredi jáne sý shyǵynyn aıtarlyqtaı azaıtady, - dep atap ótti Berdibek Saparbaev.
Ekologııa, geologııa jáne tabıǵı resýrstar mınıstri Maǵzum Myrzaǵalıev el Prezıdentiniń aldaǵy 10 jylda sýarmaly jerlerdiń aýmaǵyn 1,6 mıllıonnan úsh mıllıon gektarǵa deıin ulǵaıtý týraly tapsyrmasy bar ekenin atap ótti.
Sý máselesinde táýeldilikti azaıtý úshin jańa sý qoımalaryn qurýdyń mańyzdylyǵy aıtpasaq ta túsinikti. Osy oraıda Talas pen Baızaq aýdandarynyń shekarasynda syıymdylyǵy 11 mıllıon tekshe metr bolatyn Aqmola sý qoımasyn salý josparlanýda. Joba quny - 4,8 mlrd. teńge. Jobanyń maqsaty – Temirbek stantsııasynyń astyndaǵy Talas ózeniniń bo
ıyndaǵy jerlerdi sýarý úshin kepildi sýmen qamtamasyz etý.
Oblys ákimi qolaıly tabıǵı landshaftty eskere otyryp, munda 500 mıllıon tekshe metrge deıin ylǵal jınaý múmkin ekendigin eskerip ótti. Maǵzum Myrzaǵalıev jobany qoldap, mınıstrlik tarapynan qoldaý kórsetiletindigin jetkizdi.
