Jambylda «Spýtnık V» vaktsınasynyń ІІ dozasyn 6 myńǵa jýyq adam qabyldady
TARAZ. QazAqparat – Jambyl oblysynda «Spýtnık V» vaktsınasynyń ІІ dozasyn 6 myńǵa jýyq adam qabyldap úlgerdi. Bul týraly óńirlik kommýnıkatsııalar alańynda ótken brıfıngte oblystyq densaýlyq saqtaý basqarmasynyń basshysy Áset Qalıev aıtty, dephabarlaıdy QazAqparat tilshisi.
Aıta ketý kerek, oblys boıynsha «Gam-Kovıd-Vak» ıaǵnı, «Spýtnık V» vaktsınasynyń І komponenti 14 005 adamǵa egilgen bolatyn. Onyń ishinde 604 medıtsına mamany, 3256 pedagog, 426 kúsh qurylym qyzmeti, 58 stýdent, 81 memlekettik qyzmetker bar desek, 4142-si taǵy basqalary. Al, 21 kúnnen keıin 14005 adamnyń 5651-i vaktsınanyń ekinshi dozasyn saldyryp úlgergen.
«Vaktsına alǵandar tarapynan densaýlyǵyna teris áser berip, shaǵym keltirgender tirkelgen joq. Halyq densaýlyǵy jáne densaýlyq saqtaý júıesi týraly» QR kodeksiniń 77 babyna sáıkes, barlyq medıtsınalyq protsedýralar, sonyń ishinde vaktsınatsııa aqparattandyrylǵan azamattyń kelisimimen jasalynady. Vaktsınatsııadan bas tartqan azamattar ákimshilik jáne qylmystyq jaýapkershilikke tartylmaıdy.
Vaktsınatsııa elimizde tek erikti túrde júrgiziledi», — dedi Áset Qalıev.
Búginde Jambyl óńiri jasyl aımaqta. Degenmen, COVID-19 6613 adamnan anyqtaldy. Pnevmonııanyń 2075 jaǵdaıy tirkelgen. Qazir oblystaǵy ınfektsııalyq statsıonardaǵy 439 naýqastyń 32-si jansaqtaý bóliminde jatyr. Al aımaqta ekpe júrgizý boıynsha aq halattylar arnaıy daıyndyqtan ótken. Mamandar sany 1022-di quraıdy. 36 ekpe kabıneti, 1 jyljymaly ekpe egý pýnkti men 16 kóshpeli ekpe júrgizetin brıgada bar.
