Jambylda sońǵy qońyraýdan keıin 70-ten astam oqýshy polıtsııaǵa jetkizilgen
TARAZ. QazAqparat – Jambyl oblysynda sońǵy qońyraýdan keıin 70-ten astam jasóspirim polıtsııaǵa jetkizilgen, dep habarlaıdy QazAqparat tilshisi.
Quqyq buzýshylyq pen qylmystyń aldyn alý, sondaı-aq kámeletke tolmaǵandardy qylmystyq ortaǵa tartýdy boldyrmaý maqsatynda aǵymdaǵy jyldyń 25 mamyrynda Jambyl oblysynyń barlyq mektepterinde sońǵy qońyraý merekesine arnalǵan is-sharalar kezinde polıtsııa qyzmetkerleri jastar kóp jınalatyn oryndarda patrýldik qyzmet jasaqtarynyń jumysyn kúsheıtti, shomylý oryndaryn da qadaǵalaýǵa aldy.
Sondaı-aq, qoǵamdyq tártipti buzýdy, onyń ishinde mektep oqýshylarynyń qatysýymen oryn alýy múmkin jol-kólik oqıǵalarynyń aldyn alýǵa qatysty jaǵdaıdy baqylaý maqsatynda Polıtsııa departamentiniń Jergilikti polıtsııa qyzmeti basqarmasy, qalalyq jáne aýdandyq polıtsııa bólimderiniń basshylary qatarynan jedel shtabtar qurylǵan.
Mobıldi toptardyń reıdteri barysynda ishki ister organdaryna 72 kámeletke tolmaǵan bala jetkizildi, 76 ata-ana men ózge de zańdy ókilder ákimshilik jaýapkershilikke tartyldy.
«Kámeletke tolmaǵandardyń túngi ýaqytta oıyn-saýyq mekemelerinde bolǵany úshin kafe-bardyń 2 ıesi jaýapkershilikke tartyldy. Dúkenniń eki ıesi-alkogol ónimderin satý erejeleri týraly QR zańnamasyn buzǵany úshin, 71 ata-ana kámeletke tolmaǵan balalarynyń túngi ýaqytta oıyn-saýyq mekemelerinde jáne turǵyn úıden tys jerde bolǵany úshin ákimshilik jaýapkershilikke tartyldy. Tutastaı alǵanda, oblys boıynsha is-sharalar ótkizý barysynda tótenshe jaǵdaılar oryn alǵan joq. Kámeletke tolmaǵandardy zańsyz áreketterge tartý derekteri anyqtalmady», - dep atap kórsetti oblystyq Polıtsııa departamentiniń Jergilikti polıtsııa qyzmeti basqarmasy ıývenaldy polıtsııa tobynyń erekshe tapsyrmalar jónindegi aǵa ınspektory polıtsııa polkovnıgi Qýanyshbek Qaljanov.
