Jambylda shetelden kelgen azamattar medıtsınalyq baqylaýdan ótýde

TARAZ. QazAqparat – Jambyl oblysynda qazirgi ýaqytta basqa elden kelgen azamattarǵa medıtsınalyq baqylaý monıtorıngi júrgizilýde. Bul týraly oblystyq densaýlyq saqtaý basqarmasynyń basshysy Marat Jumanqulov óńirlik kommýnıkatsııalar qyzmetinde ótken brıfıngte aıtyp berdi, dep habarlaıdy QazAqparat.

Basqarma basshysynyń aıtýynsha, medıtsınalyq uıymdar koronavırýstyq ınfektsııamen aýyratyn naýqastardy qabyldaýǵa jáne emdeýge, sondaı-aq 1A sanattaǵy elderden (QHR, Iran, Ońtústik Koreıa) kelgen adamdardy 14 kúnge statsıonarlyq jaǵdaıda karantınge oqshaýlaýǵa daıyn.

Barlyq meduıymdarda medıtsına qyzmetkerleri jeke qorǵaný quraldary, dezınfektsııalyq preparattar, dárilik zattardyń qajetti qorymen qamtamasyz etilgen.

Qazirgi ýaqytta basqa elderden kelgen azamattarǵa (1-A, 1-B, 2, 3- sanat) medıtsınalyq baqylaý monıtorıngi júrgizilýde.

«2020 jyldyń 10 naýryzyna oblys aýmaǵynda 1A-sanatyndaǵy elderden, ıaǵnı QHR, Iran, Ońtústik Koreıadan kelgen 51 azamat karantınge jatqyzylaǵan. Oqshaýlanǵan tulǵalardyń jaǵdaıy birqalypty. Búgingi tańda 51 azamattyń 10-y ınkýbatsııalyq merzimniń aıaqtalýyna oraı shyǵaryldy. Al, 1B sanattaǵy elderden (Italııadan) kelgen 4 adam úı jaǵdaıynda 14 kúndik karantınge jatqyzylǵan. Onyń ishinde bir azamat ınkýbatsııalyq merzimniń aıaqtalýyna oraı baqylaýdan alyndy»,-dedi basqarma basshysy.

Sondaı-aq, spıker 2-sanattaǵy Germanııa men Ispanııa elderinen kelgen 11 azamat 14 kúnge medıtsınalyq baqylaýǵa alynǵanyn, onyń ishinde 3 azamat ınkýbatsııalyq merzimniń aıaqtalýyna oraı baqylaýdan bosatylǵanyn jetkizdi.

«Sol sııaqty 3-sanattaǵy elderden kelgen 195 azamat esepke alyndy. Onyń ishinde 26 azamat ınkýbatsııalyq merzimniń aıaqtalýyna oraı baqylaýdan shyǵaryldy. Osy baǵyttaǵy jumystar jalǵasýda jáne kúndelikti baqylaýda»,-dedi M.Jumanqulov.