Jambylda sanıtarlyq-epıdemııalyq is-sharalardyń oryndalýyn 18 mobıldik top baqylaıdy
Jambyl oblysynyń ákimi Berdibek Saparbaev apparat keńesinde Memleket basshysynyń koronavırýs COVID-19 pandemııasyna baılanysty Qazaqstanda tótenshe jaǵdaıdy engizý týraly Jarlyǵynan týyndaǵan mindetterge aıryqsha toqtaldy,
Aıtalyq, azamattardyń ómiri men densaýlyǵyn qorǵaýdy qamtamasyz etý maqsatynda qoǵamdyq tártipti, sondaı-aq halyqtyń tynys-tirshiligin qamtamasyz etetin nysandardy qorǵaý kúsheıtiletin bolady.
Tótenshe jaǵdaı kezinde oblysta búkil respýblıka boıynsha sekildi oıyn-saýyq, sporttyq jáne basqa da buqaralyq is-sharalar, sondaı-aq jappaı otbasylyq saltanat pen dástúr-joralǵylardy ótkizýge tyıym salynady. Dámhana men meıramhanalardyń jumysy keshki 22:00 saǵatqa deıin shekteledi, kelýshiler sany 50 adamnan aspaý kerek.
Іri saýda ortalyqtarynyń jumys isteýi úshin de tıisti shekteýler engiziledi. Olardyń jumys rejımi saǵat 10:00-nan 18:00-ge deıin belgilenedi. Azyq-túlik dúkenderi, sýpermarketter men bazarlar sanıtarlyq jáne dezınfektsııalyq sharalardy kúsheıte otyryp, qalypty rejımde jumys isteýi tıis.
Balabaqshalar medıtsınalyq jáne sanıtarlyq baqylaýdy kúsheıte otyryp, ádettegi rejımde jumys isteıdi. Al mektepten tys qosymsha bilim berý mekemeleri óz jumysyn toqtatady.
Qoǵamdyq oryndarda, mekemelerde, qoǵamdyq kólikte sanıtarlyq-epıdemııaǵa qarsy is-sharalardy turaqty júrgizý uıymdastyrylatyn bolady.
Sonymen qatar, aımaq basshysy oblystyq densaýlyq saqtaý basqarmasynyń basshysy Marat Jumanqulovqa dárihanalardaǵy medıtsınalyq betperdelerdiń tapshylyǵyn, keı jerde bar bolǵanymen ol 150 teńgege deıin joǵary baǵamen satylyp jatqandyǵyn jetkizdi. Bul máseleni sheshý oblys ákiminiń orynbasary Erjan Jylqybaevqa naqty tapsyrma júktedi.
Sondaı-aq, oblys ákimi tıisti organdardyń basshylaryna Áýlıe-Ata áýejaıy men Qyrǵyz Respýblıkasymen shekaradaǵy sanıtarlyq-epıdemıologııalyq baqylaý sharalaryn kúsheıtý jóninde tapsyrma berdi. Aýrý boıynsha kúdikti árbir adam dereý aýrýhanaǵa jatqyzylýy tıistigi aıtyldy.
Sondaı-aq Berdibek Saparbaev halyq arasynda aqparattyq túsindirý jumystaryn kúsheıtýdi talap etti. Adamdar vırýstan qalaı qorǵanýdy jáne tótenshe jaǵdaı kezinde qandaı erejelerdi saqtaýdy bilýi kerektigin tilge tıek etti. Sonymen qatar, oblys ákimi osyndaı kúrdeli kezeńde tutyný taýarlary naryǵynda turaqtylyqty qamtamasyz etýdiń mańyzdylyǵyn jetkizdi.
Aıta keteıik, 13 naýryzda Taraz qalasy men Jambyl oblysynyń aýdandarynda 18 mobıldi top qurylǵan, olar qoǵamdyq oryndarda, mekemelerde, qoǵamdyq kólikte sanıtarlyq-epıdemııaǵa qarsy is-sharalardyń júrgizilýine baqylaý jasaýda.