Jambylda salynatyn zaýyt qurylysyna 800 mln dollar ınvestıtsııa jumsalady
Dmıtrıı Valyshev Qazaqstandaǵy «EvroHım» kompanııasynyń strategııalyq damý josparynyń birinshi kezeńin iske asyrý nátıjelerine qysqasha toqtalyp ótti. 2012 jyldan bastap 2019 jylǵa deıin jeti jyl ishinde qýaty jylyna 640 myń tonna fosfor untaǵyn óndirýge qaýqarly taý-ken kesheniniń qurylysy júzege asyryldy. 500-ge jýyq adam turaqty jumyspen qamtylǵan.
Qazir kompanııa ekinshi kezeńdi júzege asyrýǵa kirisken.
Bıylǵy shilde aıynda Qazaqstan Respýblıkasynyń Úkimeti men Reseı Federatsııasynyń Úkimeti qýaty jylyna mıllıon tonna mıneraldy tyńaıtqysh shyǵaratyn zaýyt salý jáne paıdalaný týraly úkimetaralyq kelisimge qol qoıǵan bolatyn. Joba Qarataý fosforıt basseıniniń ken oryndaryn ıgerýdi kózdeıdi.
Investıtsııanyń boljamdy kólemi - 800 mıllıon dollar.
Jobany iske asyrýdyń boljamdy merzimi – 2021-2025 jyldar aralyǵy. Kásiporynnyń qurylysy kezinde 2 myń adam jumyspen qamtylady desek, nysan paıdalanýǵa berilgennen keıin 1200 turaqty jumys orny ashylady dep kózdelýde.
- Mıneraldy tyńaıtqyshtardan basqa zaýytta munaı-gaz óndirisinde, qysqy maýsymda jol jelisin kútip ustaý úshin tsement, qurǵaq qurylys qospalary, jerdi melıoratsııalaý óndirisinde qoldanylatyn ónerkásiptik ónimder shyǵarý josparlanǵan, - deıdi Dmıtrıı Valyshev.
Onyń aıtýynsha, jańa zaýyt jobasy Qazaqstannyń eksporttyq áleýetin jáne azyq-túlik qaýipsizdigin arttyrýǵa, aýyl sharýashylyǵy men óńdeý ónerkásibin damytýǵa yqpal etedi. Álemde balamasy joq ınnovatsııalyq joǵary tehnologııalyq óndiris iske qosylady.
Berdibek Saparbaev joǵary bilikti mamandar daıarlaýdyń mańyzyn atap ótti.
Dmıtrıı Valyshevtiń aıtýynsha, kompanııa kadr tapshylyǵy máselesine erekshe nazar aýdarady. Ekinshi jyl qatarynan Jańatas oqýshylary «EvroHım-Qarataý» JShS qoldaýynyń arqasynda M.I.Platov atyndaǵy Ońtústik-Reseı memlekettik polıtehnıkalyq ýnıversıtetine oqýǵa túsken. Barlyq túlekter óndiristik mamandyqtardy meńgerip shyǵady.
Seriktestik dırektory «EýroHımnyń» aımaqtyń áleýmettik-ekonomıkalyq damýyna óz úlesin qosatynyn jetkizdi.
Sarysý aýdanynda kompanııa áleýmettik ınfraqurylymdy damytýǵa 23 mıllıon dollar jumsaǵan. Turǵyn úıler jóndelip, áleýmettik nysandar salynǵan, Sarysý aýdanynda ǵana emes, Talas aýdanynda da ortalyq aýdandyq aýrýhanaǵa reanımobıl satyp alyp bergen.
Aldaǵy bes jylda seriktestiktiń áleýmettik aýdarymdary esebinen jergilikti ákimdikpen birge aýlalardy abattandyrý, sport-saýyqtyrý keshenin jáne Jańatas qalasynda jastar ortalyǵyn salý josparlanǵan.
- Shaǵyn qalalardy damytý úshin memlekettik bıýdjetten qomaqty qarjy bólingen. Turǵyn úıler, joldar jóndelýde, kommýnıkatsııa tartylyp, jańa jumys oryndary ashylyp jatyr. Eger bıznes áleýmettik jaýapkershilikti umytpasa jáne jergilikti bılikpen yntymaqtastyqta bolsa, álbette bul ekonomıkanyń ósýine jáne qazaqstandyqtardyń ál-aýqatyna tikeleı áser eteri sózsiz. Jańatas qalasyn burynǵydaı gúldendirý úshin bıznes jáne jergilikti atqarýshy organdar birlesip jumys jasaýy qajet, - dep atap ótti oblys ákimi.
Sondaı-aq kezdesý barysynda taraptar ınfraqurylym tartýǵa qatysty máselelerdi talqylady.
