Jambylda Prezıdent tapsyrmalarynyń oryndalý barysy qaraldy
TARAZ. QazAqparat – Jambyl oblystyq jedel shtabtyń kezekti otyrysynda Qazaqstan Respýblıkasy Prezıdentiniń aǵymdaǵy jylǵy 27 sáýirdegi Qazaqstan halqyna Úndeýinde aıtylǵan mindetterdi júzege asyrý týraly másele qaraldy, - dep habarlaıdy QazAqparat oblys ákimdiginiń resmı saıtyna silteme jasap.
Búgingi tańda oblysta koronavırýstyń 106 jaǵdaıy tirkelgen, 43-i emdelip shyqty. Negizgi mindet – naýqastardyń sanyn kóbeıtip almas úshin qatań baqylaýdy ustap turý.
- Jumysyn bastaıtyn shaǵyn jáne orta kásiporyndardyń tizimin jasaý kerek. Olarǵa jumysyn qaıta bastaý úshin ruqsat tek qaýipsizdik tehnıkasy men sanıtarlyq talaptardy saqtaı alatyndyǵyn dáleldeı alǵanda ǵana beriledi. Olardyń saqtalýyn baqylaý aýdan ákimderine júkteledi, - dedi aımaq basshysy.
Kúnine keminde eki ret dezınfektsııalaý jáne qorǵanys kostıýmderi men betperdeleriniń bolýy basty nazarǵa alynbaq.
Usynylǵan shaǵyn jáne orta kásiporyndar tizimnen shashtarazdar men sulýlyq salondaryn alyp tastaý týraly sheshim qabyldandy. Onda adamdardyń jıi baılanysta bolýy múmkin jáne sanıtarlyq talaptardyń oryndalýy qıyn. Alaıda, qyzmet kórsetý stantsııalary, avtojýý, azyq-túlik emes dúkender jáne basqa da obektiler óz jumysyn bastaıdy. Al, meıramhanalar men dámhanalar áli de jetkizip berý rejıminde qyzmet ete beredi.
Tıisti oryndar áleýmettik jelilerde jalǵan aqparattar taratyp, qoǵamdy dúrliktiretin tulǵalardy anyqtaý jónindegi jumysty jandandyrýy mańyzdy.
- Memleket basshysy aıtqandaı, 11 mamyrǵa deıin el ekonomıkasyn qalpyna keltirýdiń keshendi jospary túziledi. Osy oraıda Jambyl oblysy da 7 mamyrǵa deıin óz nusqasyn ázirlep, úkimetke usynýy kerek.
Shekteý sharalaryn engizý aımaq ekonomıkasyna qaı deńgeıde áser etetini, qandaı sharalar kóp zardap shegedi, qaı jerlerde tabystyń tómendeýi, jumyssyzdyq deńgeıi artatyny týraly boljam jasaý qajet. Bastapqy boljamdarǵa sáıkes, bul saýda, kásipkerlik, mádenıet, óner jáne sport salalary. Osyǵan qaraı, 30 sáýirge deıin aýmaqtyq jumyspen qamtý jol kartasyn ázirleý qajet.
Negizgi maqsat – keminde 26 myń, onyń ishinde 11 myń turaqty jumys ornyn qurý, jumys oryndarynyń jappaı bosaýyna jol bermeý.
Eń bastysy - tártipti saqtaý, ár adamnyń óz taǵdyry úshin ǵana emes, sonymen birge jaqyn jáne aınalasyndaǵy adamdardyń taǵdyry úshin de jaýapkershilikti sezinýi tıis, - dedi Berdibek Saparbaev jedel shtab otyrysyn qorytyndylaı kele.
