Jambylda polıtsııa urlanǵan múlikti satyp alýshylarmen kúresedi
TARAZ. QazAqparat - Jambyl oblysynda bir aıda 21 avtokólik akkýmýlıatorynyń urlyǵy tirkeldi, dep habarlaıdy QazAqparat tilshisi.
Jambyl oblystyq ІІD baspasóz qyzmetiniń málimdeýinshe, bazarlarda qujaty joq taýarlardy satyp alatyn kásipkerlerdi anyqtaý úshin reıd ótkizilgen.
«Polıtseıler bıznesmenderge zańdy buzǵan tulǵalarǵa qandaı jazalar qoldanylyp, is nasyrǵa shapsa, tipti bas bostandyǵynan aıyrylatyny eskertildi. Qazirgi jaǵdaıdy eskere otyryp, jambyldyq polıtseıler urlanǵan zatty alyp satýshylarǵa qarsy ymyrasyz kúres jarııalandy», - deıdi tártip saqshylary.
ІІD ókilderiniń aıtýynsha, avtomobıl qosalqy bólshekteriniń arasynda akkýmýlıator urlyǵy jıi kezdesedi. Tek tamyz aıynda 21 akkýmýlıator urlyǵy tirkelip, sonyń 18-i ashylǵan.
Atap aıtqanda, 23 tamyzda T.Rysqulov aýdanynyń Qulan aýylynda júk kóliginiń 7 akkýmýlıatoryn urlaǵan Almaty oblysynyń eki turǵynynan quralǵan qylmystyq top ustaldy.
Vedomstvonyń málimetterine súıensek, 2018 jyldyń alty aıynda Jambyl oblysynda Krımınaldyq polıtsııa basqarmasynyń qyzmetkerleri kóliktiń qosalqy bólshekterin, avtomobılden jeke buıymdardy urlaýǵa qatysty 19 qylmysty ashqan. 2017 jyly osyndaı 92 fakti ashylǵan. Statıstıkaǵa júginsek, avtomobılden negizinen, akkýmýlıator, magnıtola, uıaly telefondar jıi urlanady.
Illıýstratsııalyq foto
