Jambylda paıdalanylmaı jatqan 553 myń gektar jer memleketke qaıtaryldy

ASTANA. QazAqparat - Jambyl oblysynda paıdalanylmaı jatqan 553 myń gektar jer memleketke qaıtaryldy. Bul týraly búgin Ortalyq kommýnıkatsııalar qyzmetindegi brıfıngte Jambyl oblysynyń ákimi Kárim Kókirekbaev málim etti, dep habarlaıdy QazAqparat.

«Elbasy oblysqa jumys sapary barysynda kóptegen aýyl sharýashylyǵy jerleriniń paıdalanylmaı jatqandyǵyna  toqtalyp, olardy qaıtarýdy tapsyrdy. Oblysta sońǵy 5 jylda paıdalanylmaı jatqan 553 myń gektar aýyl sharýashylyǵy  jerleri anyqtalyp, memleketke qaıtaryldy», - dedi oblys basshysy.

Kárim Kókirekbaevtyń aıtýynsha, onyń 539 myń gektary ekonomıkalyq aınalymǵa qaıta  tartyldy.

«Agrarlyq salaǵa ınvestıtsııa tartý maqsatynda 295 myń gektar aýyl sharýashylyǵy jerleri ázirlendi. Aǵymdaǵy jyldyń 8 aıynda ınvestıtsııalyq jobalardy iske  asyrý úshin barlyǵy 827 gektar jer bólindi», - dedi ol.

Jalpy óńir basshysynyń derekterine sáıkes, Indýstrııalyq-ınnovatsııalyq damýda Jambyl oblysy oń nátıjelerge qol jetkizgen. Indýstrııalandyrý kartasynyń ekinshi besjyldyǵynyń aıasynda 557 mlrd teńgeni quraıtyn 34 joba júzege asyrylyp, 6 myń jańa jumys orny ashylǵan. Bıyl somasy 17,3 mlrd teńgeni quraıtyn  13 joba júzege asyrylýda. Olarda  shamamen 1350 jumys orny ashylady.