Jambylda «Parasatty otbasy» baıqaýynyń jeńimpazdary marapattaldy
TARAZ. QazAqparat – Jambyl oblysynda «Parasatty Otbasy» baıqaýy óz máresine jetti,- dep habarlaıdy QazAqparat tilshisi.
Baıqaýǵa qatysqan barlyǵy 9717 otbasynyń ishinen eń úzdikteri anyqtaldy.
Bas júlde «Parasatty otbasy» nomınatsııasyn Jambyl aýdany Shaıqoryq aýylynyń Ábildaevtar otbasy jeńip aldy. Otaǵasy Tájiǵul Ábildaev oblystyǵy eń iri kásiporyn «Kazfosfat» JShS-da eńbek etedi. 4 bala tárbıelep otyrǵan Ábildaevtar otbasy baýyrmaldyq, qaıyrymdylyq, dostyq, otansúıgishtik ıgi qaǵıdalaryn negizgi ustanymyna aınaldyrypty.
Sondaı-aq, budan bólek 19 otbasy «Úzdik oqyrman otbasy», «Ónerli otbasy», «Jomart otbasy», «Intellektýaldy otbasy», «Kóptildi otbasy», «Sheberler otbasy», «Óndiristegi úzdik otbasy», «Eń salaýatty otbasy», «Shyǵarmashyl otbasy» sekildi nomınatsııalar boıynsha marapattalyp, úzdikter qatarynan kórindi.
Jeńimpazdar Jambyl oblysy ákiminiń orynbasary Talǵat Mamaev jáne QR Sybaılas jemqorlyqqa qarsy is-qımyl agenttiginiń Jambyl oblysy boıynsha departament basshysy Ádilbek Áshirbaev quttyqap, baǵaly syılyqtar tabys etti.
«Baıqaý QR sybaılas jemqorlyqqa qarsy is-qımyl agenttiginiń oblys boıynsha departamenti, «Jambyl adaldyq alańy» jáne oblystyq bilim basqarmasynyń uıymdastyrýymen bıyl ekinshi ret uıymdastyrylyp otyr. Mundaǵy maqsat – qoǵamnyń negizin qalaıtyn otbasy ınstıtýtyn damytý. Sondaı-aq otbasyndaǵy baýyrmaldyq, qaıyrymdyq qasıetterdi óskeleń urpaqtyń boıyna sińirý. On myńǵa jýyq otbasy qatysqan baıqaýdyń aqtyq synynda «Parasatty otbasy», «Kóp tildi otbasy», «Intellektýaldy otbasy» syndy nomınatsııalar kóptiń kóńilinen shyqty, – dedi Talǵat Mamaev.
Sondaı-aq, atalǵan departamentiniń basshysy Ádilhan Áshirbaev atalǵan baıqaýdyń óńirdegi otbasylardy parasattylyqqa baýlıtynyn tilge tıek etip, qoǵamnyń jaqsarýy osyndaı ónegeli otbasylardan bastalatynyn jetkizdi.
