Jambylda pandemııa kezinde bólingen 21 mln teńgeni jymqyrǵan sheneýnikter sottaldy

QORDAI. QazAqparat - Jambyl oblysynyń Qordaı aýdanynda sheneýnikter áleýmettik osal toptarǵa kommýnaldyq tólemin tóleý úshin bólingen qarjynyń 21 mln 600 myń teńgesin qaltasyna basqan, dep habarlaıdy QazAqparat tilshisi.

Sot úkimimen osy qylmysqa barǵan memlekettik qyzmetshiler 3 jyldan 7 jylǵa deıin bas bostandyǵynan aıyryldy.

«Qordaı aýdany ákimdiginiń turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń basshysy 3 jyl 6 aıǵa, osy bólimniń sektor meńgerýshisi 7 jylǵa, maman - 3 jyl 6 aıǵa, taǵy da osy bólimde kelisimshartpen jumys istegen maman 7 jylǵa sottaldy. Sondaı-aq bir kásipker sot úkimimen 3 jyl 6 aıǵa bas bostandyǵynan aıyryldy»,- dedi Qordaı aýdany prokýrorynyń orynbasary Qaısar Bekmuratov QazAqparat tilshisine.

Prokýrorlar tekserisi kórsetkendeı, 2020 jylǵy pandemııa kezinde memlekettik bıýdjetten 26 mln teńge bólingen.

Bul soma áleýmettik osal topqa jatatyn turǵyndardyń kommýnaldyq shyǵynyn óteýge baǵyttalǵan bolatyn.

Prokýratýra málimetinshe, Qordaı aýdany ákimdiginiń turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń basshysy, 3 qyzmetkeri jáne bir kásipker qylmystyq top quryp, aldyn ala sóz baılasý arqyly bólingen qarajatty talan-tarajǵa salǵan.

Osylaısha jergilikti turǵyndar úshin aýyr ýaqytta memleketten bólingen qarajat muqtaj azamattardyń qaltasyna jetpeı jymqyrylǵan.

Atalǵan fakti boıynsha Qordaı aýdany prokýratýrasy Qylmystyq kodekstiń 189-baby 4-bóligi 2-tarmaqshasy boıynsha sotqa deıingi tergeý júrgizdi.

«Nátıjesinde aýdandyq sottyń úkimimen qylmyskerlerdiń kinási tolyq dáleldendi. Búgingi tańda memleketke 18,8 mln teńge qarajat qaıtaryldy»,- dep tolyqtyrdy aýdan prokýrorynyń orynbasary Qaısar Bekmuratov.