Jambylda «Osteosarkoma» qaterli isigine alǵash ret kúrdeli ota jasaldy
TARAZ. QazAqparat – Jambyldyq dárigerler óńirde alǵash ret «Osteosarkoma» qaterli isigine kúrdeli ota jasady,- dep habarlaıdy QazAqparat tilshisi.
23 jastaǵy Taraz qalasynyń turǵyny aýrýy janyna batyp, bir aptadaı aıaǵynan júre almaı qalǵan soń, Jambyl oblystyq kópbeıindi aýrýhanasynyń onkologııalyq qurylymyna qaıyrylady. Medıtsınalyq tekseristen ótkizilgen soń, onyń san súıeginde qaterli isiktiń barlyǵy anyqtalady. «Osteosarkoma» dep atalatyn qaterli isik, súıek tininen paıda bolady jáne ol súıekterde kezdesetin qaterli protsess.
Mundaı jaǵdaıda ýaqyt ótkizbeı shuǵyl túrde hırýrgııalyq operatsııa arqyly isikti alyp tastaý qajet. Jambyl oblysynda mundaı ota túri buryn-sońdy jasalmaǵan. Ol úshin naýqastar Almaty nemese Nur-Sultan qalalaryndaǵy arnaıy ortalyqtarǵa jiberiletin. Jergilikti dárigerler ózara keńese kele, biraýyzdan ota jasaýdy uıǵarady.
2 saǵattan astam ýaqytqa sozylǵan kúrdeli ota túrine hırýrgtar men onkologtar baryn salady. Sátti jasalǵan otadan soń, naýqas jansaqtaý bólimine keıinirek palataǵa aýystyrylǵan.
«Densaýlyǵym jaqsy. Qazir esh jerim aýyrmaıdy, súıemeldese jaılap júre alamyn. Meni aıaqqa turǵyzǵan dárigerlerge alǵysym sheksiz. Endi men aldaǵy ýaqytta qaıtadan sportpen aınalysa alatyn boldym. Qýanyshymda shek joq», - deıdi 23 jasar tarazdyq.
Mamandardyń pikirinshe, bul óte sırek kezdesetin kesel. Medıtsına tilimen aıtqanda, sarkomaǵa ýaqtyly operatsııa jasamasa, keıin kesh bolady. Mundaı jaǵdaıda jigittiń aıaǵyn kesýge týra keletin edi. Onkohırýrgter qaterli isikti alyp qana qoımaı, endoprotez ımplantatsııasyn da qoıdy. Endi ol tize býyny qyzmetin atqarady.
«Buryn mundaı dıagnoz qoıylǵan naýqas úshin bizdiń medıtsına dármensiz bolatyn, al qazir isik jaıylyp ketse de kúrese alatyn jaǵdaıǵa jettik. Endi patsıent ári qaraı hımııa, sáýle terapııalaryn alyp, emdele alady. Biz jańa tehnologııalardyń kómegi men zamanaýı qondyrǵylardyń arqasynda naýqastyń aıaǵyn saqtap qaldyq. Endi ońaltý sharalarynan keıin, patsıentimiz tolyqqandy ómirge oralady», - deıdi onkologııalyq qurylymnyń onkohırýrgi Jandos Seıdahmetov.
Aldaǵy ýaqytta Jambyl oblystyq kópbeıindi aýrýhanasynyń onkologııalyq qurylymynda mundaı ota túri jasalatyn boldy.
