Jambylda óńir ekonomıkasyn arttyrýǵa baǵyttalǵan taǵy bir joba qolǵa alynbaq
TARAZ. QazAqparat –Jambyl oblysynda halyqtyń turmysyn jaqsartyp, ekonomıkasyn kóterýge baǵyttalǵan taǵy bir jańa joba qolǵa alynbaq, dep habarlaıdy QazAqparat tilshisi.
Oblys turǵyndarynyń basym bóligi aýyldy jerlerde turatynyn eskergen aımaq basshysy Asqar Myrzahmetov aýyldyqtardyń ahýalyn arttyrýǵa asa den qoıyp otyr. Búginde turǵyndardyń turmystyq tabysyn jaqsartýdyn pılottyq jobasy júzege asyrylýda, endigi kezekte taǵy bir ilkimdi bastama qolǵa alyndy. Bul týraly oblys ákiminiń qoǵammen baılanys jónindegi keńesshisi Birjan Sartbek Facebook-tegi paraqshasynda jarııalady.
Onyń aıtýynsha jańa joba boıynsha óńirimizdiń ár aımaǵynan, ásirese, aýyldy jerlerden shaǵyn tsehtar salý kózdelýde. Oblys ákimdiginde ótken jıynda osy týraly jan-jaqty aıtylyp, josparly sharalar barysy pysyqtalǵan.
«Jańa jobanyń negizgi maqsaty – aýdan, aýyldyq jerlerde shaǵyn qaıta óndeý kásiporyndary men tsehtar salyp, syrttan keletin ónimderdiń aldyn alý, sol arqyly jergilikti halyqtyń jaǵdaıyn jaqsartý, ekonomıkasyn kóterý. Óńir basshysy óz sózinde osyǵan aıryqsha basymdyq berdi. Óıtkeni, atalǵan pılottyq joba tolyǵymen júzege asa bastaǵanda aýyldardaǵy qosalqy sharýashylyqtarda óndiriletin eginshilik pen mal ónimderi edáýir arta túsetini sózsiz. Al ony aýyldan alys uzatpaı utymdy uqsatyp, óndeı bilý – tıimdilikti tipti eseleı túsetinin aıtpasaq ta túsinikti. Ekinshiden bul jańa jumys oryndaryn ashýǵa múmkindik beredi», - dep jazady B.Sartbek.
Atalmysh basqosý barysynda oblystyq ınvestorlarǵa qyzmet kórsetý, jobalyq basqarý jáne tsıfrlandyrý ortalyǵynyń basshysy Damır Egizbaev jańa jobanyń negizgi júıesi týraly baıandap, qazirgi tańda aýdandar men aýyldardan naqty usynystardyń jınaqtalyp jatqandyǵyn jetkizdi.
Bul bastamanyń mańyzdylyǵyna toqtalǵan Asqar Myrzahmetov irimshik, sút, shujyq taǵy da basqa aýyl sharýashylyq ónimderin óndiretin tsehtardy salý jumystaryn qazirden bastap júıeleı berý kerektigin tapsyrdy. Sondaı-aq, óńirdegi kásiporyndardyń júktemeligin barynsha kóterýge kóńil bólip, sol arqyly syrttan jetkiziletin taýarlardyń úlesin edáýir azaıtýǵa bolatynyn basa aıtty.
«Aldaǵy ýaqytta joba aıasynda óńirdegi barlyq qajettilikter men múmkinshilikter zerdelenip, aýdandardyń erekshelikteri eskerile otyryp jınaqtalǵan usynystarǵa taldaý, saralaý sharalary atqarylmaq. Ol úshin aldymen atqarylar jumys josparyn júıelep alý kerektigin aıtqan aımaq basshysy jaýapty tulǵalarǵa naqty tapsyrmalar júktedi», - deıdi B.Sartbek.
