Jambylda on tórt adamnyń 15 mln teńgesin qaltasyna basqan alaıaq ustaldy
TARAZ. QazAqparat – Jambyldyq polıtseıler ákki alaıaqty ustady, dep habarlaıdy QazAqparat tilshisi.
Taraz qalasynyń polıtsııa basqarmasy 1- polıtsııa bólimi tergeý bólimshesiniń qyzmetkerleri iri kólemde jasalǵan birneshe alaıaqtyq deregin ashty.
Osy derekter boıynsha tergeý amaldarynyń nátıjesinde Jýaly aýdanynyń 50 jastaǵy turǵyny anyqtalyp, ustaldy.
«Osylaısha istiń mán-jaıyn anyqtaý barysynda kúdiktiniń 2018-2019 jyldar aralyǵynda oblys ortalyǵynda turyp, «TIENS-Qazaqstan» kompanııasyndaǵy dıstrıbıýtor-áriptesteriniń senimine kirip, jelilik marketıngte olardyń sapa deńgeıin arttyrý úshin óziniń aqyly qyzmetterin usynǵany belgili boldy. Osynyń nátıjesinde ol 14-ke jýyq jábirlenýshini aldap, olardan 1 mıllıonnan 15 mıllıon teńgege deıingi kólemde aqsha alǵan» delingen oblystyq polıtsııa departamenti baspasóz qyzmetiniń habarlamasynda.
Atalǵan qylmysqa qatysty QR QK 190-baby boıynsha sotqa deıingi tergeý amaldary júrgizilýde.
Alaıaqtyq qurbany bolǵan basqa da adamdar anyqtalyp jatyr.
