Jambylda nysandardyń koronavırýsqa qarsy daıyndyǵy zerdelendi
TARAZ. QazAqparat – Jambyl oblysy ákiminiń tapsyrmasymen qurylǵan mobıldik toptyń is-qımyl algorıtmine saı oblysy ákiminiń orynbasary Erjan Jylqybaev bastaǵan atalǵan top músheleri óńirdegi birqatar nysandardyń koronavırýsqa qarsy daıyndyǵyna monıtorıng júrgizdi, - dep habarlaıdy QazAqparat.
Mobıldik toptyń músheleri jappaı halyq keletin oryndar áýejaı men temirjol beketterine, Halyqqa qyzmet kórsetý ortalyǵy men iri saýda oryndaryna arnaıy bardy. Olar memlekettik bas sanıtarlyq dárigerdiń qaýlysyna saı kópshilik is-sharalardyń ótkizilmeýin qadaǵalaý, qoǵamdyq kólikter men aıaldamalardyń, halyq kóp shoǵyrlanatyn jerlerdiń dezınfektsııalanýy, qol jýatyn sýsabyn jáne t.b. jeke gıgıenalyq zattardyń bolýy, qoǵamdyq jerlerde aqparattyq anyqtamalyq materıaldardyń ornalasýy sekildi máselelerdi zerdeledi. Anyqtalǵan kemshilikterdi qysqa merzim ishinde rettep, saqtyq sharalaryn júrgizý tapsyryldy.
Aıtalyq, aralaý barysynda halyq kóp shoǵyrlanatyn «Mart» saýda keshenindegi kınoteatr, konkı alańy men balalar oıyn alańynyń jumysy ýaqytsha toqtatyldy. Al áli kúnge deıin jumys istep turǵan «Astana park» kınoteatrynyń ákimshiligine jumysyn toqtatý týraly eskertý berildi. Sondaı-aq, kásipkerlik nysandary, atap aıtqanda toıhanalar men meıramhanalarǵa túrli jıyndar men basqosýlardy ótkizbeý eskertildi. Jolaýshylar tasymalymen aınalysatyn mekemeler de qoǵamdyq kólikterdi jıi dezınfektsııalyq tazalaý jumystaryn bastady.
Búgingi tańda Taraz qalasynda 10 mekeme 670 birlik avtobýspen jolaýshylar tasymaldaýmen aınalysady desek, olarǵa 2000 dana jadynamalar taratylyp, jumyskerler arasynda túsindirme júrgizildi. Avtosalondarǵa bıýlletender ilindi.
