Jambylda muǵalimderge KVI-ǵa qarsy vaktsına salynyp jatyr
Taraz qalalyq emhanalarynda jalpy bilim beretin orta mektepterdiń pedagogtaryna koronavırýs ınfektsııasyna qarsy «Spýtnık V» vaktsınasyn egý bastaldy. Ony alǵashqylardyń biri bolyp oblystyq bilim basqarmasy basshysynyń mindetin atqarýshy Jámıla Bekbatyrova saldyrdy.
Jambyl oblysy ákimdigi densaýlyq saqtaý basqarmasynyń baspasóz qyzmeti habarlaǵanǵandaı, ol vaktsına qabyldar aldynda dárigerdiń tekserilýinen ótip, qarsy kórsetilimderi bolmaǵan soń, alǵashqy egýdi aldy. Dárigerdiń baqylaýynda 30 mınýttaı bolǵan Jámıla Bekbatyrova ózin jaqsy sezinetindigin aıtty.
№5 jáne «ZHANUYA» qalalyq emhanalarynda tań atqaly bastalǵan egý naýqanyna bilim salasynyń qyzmetkerleriniń barlyq toby óz erikterimen tolastamaı kelýde. Osy kúni keshke deıin 45 adamǵa vaktsınatsııa jasalady dep josparlanǵan.
Óńirge Qaraǵandy farmatsevtıkalyq zaýyty bazasynda óndirilgen «Spýtnık V» vaktsınasynyń 5250 dozasy jetkizildi. Vaktsına saldyratyndardyń tizimi jasalyp, emhanalarǵa berildi. Osy sanattaǵy adamdarǵa vaktsına salý úshin oblysta 20 emdeý mekemeleri, onyń ishinde Taraz qalasynda - 9, Shý qalasy jáne oblystyń 10 aýdandyq emhanalary jumys isteýde. Barlyq jumyldyrylǵan emhanalarda egý jumystaryn júrgizý sanıtarlyq-epıdemıologııalyq normalar men erejelerdiń talaptaryna sáıkes júzege asyrylady.
Jambyl oblysy boıynsha aǵymdaǵy jyly vaktsınanyń túsýine qaraı 18 jastan asqan 593700 adamdy COVID-19-ǵa qarsy vaktsınatsııalaýmen qamtý josparlanýda. Bul – oblys halqynyń jalpy sanynyń 52%-y. Budan basqa, keıinnen halyqtyń qosymsha osal toptaryn qosa otyryp, kontıngentti keńeıtý kózdelýde.
Qazaqstanda juqpaly aýrýlarǵa, onyń ishinde koronavırýstyq ınfektsııaǵa qarsy vaktsınatsııa tegin, erikti túrde jáne vaktsınatsııalaýǵa nıet bildirgen adamnyń aqparattandyrylǵan kelisimimen júrgiziledi. Koronavırýsqa qarsy ımmýndaý aǵymdaǵy jyldyń sońyna deıin jalǵasady.
