Jambylda mindetin durys oryndamaǵandar ata-ana quqyǵynan aıyryldy
TARAZ. QazAqparat – Jambyldyq polıtseıler kámeletke tolmaǵandarǵa qatysty birqatar reıd ótkizdi, dep habarlaıdy QazAqparat tilshisi.
Kámeletke tolmaǵandardyń keshki demalys ýaqyty jambyldyq polıtseılerdiń turaqty baqylaýynda.
Merekege baılanysty kámeletke tolmaǵandar arasyndaǵy qylmystyń aldyn alýǵa aıryqsha nazar aýdarylyp otyr.
«Máselen, aldyn alý is-sharalarynyń bir aptasynda ıývenaldy polıtsııa ınspektorlary men basqa da qyzmetterden turatyn úsh júzge jýyq qyzmetker jumyldyryldy. Sharaǵa bilim, densaýlyq saqtaý, prokýratýra salasynyń qyzmetkerleri, ata-ana komıtetteri, eriktiler, sondaı-aq basqa da múddeli organdar qatysty. Oblys boıynsha 80-nen astam reıd júrgizildi, onyń barysynda 150-den astam kámeletke tolmaǵan bala polıtsııaǵa jetkizildi, 200-den astam ata-ana men ózge de eresek adamdar jaýapkershilikke tartyldy», – dep habarlady Jambyl oblysynyń PD JPQB ıývenaldy polıtsııa tobynyń erekshe tapsyrmalar jónindegi aǵa ınspektory Qýanyshbek Qaljanov.
Jalpy, bir apta ishinde 10 kámeletke tolmaǵan jasóspirim jáne eki turmysy nashar otbasy esepke alyndy. KBO-ǵa qadaǵalaýsyz jáne panasyz qalǵan úsh kámeletke tolmaǵan bala ornalastyryldy.
Ata-ana mindetterin tıisinshe oryndamaǵany úshin eki zańdy ókil ata-ana quqyǵynan aıyryldy.
«Sonymen qatar, kámeletke tolmaǵan bes adamnyń túngi ýaqytta oıyn-saýyq mekemesine barýyna jol bergeni úshin bes ata-ana men tórt kafe-bar ıesi jaýapkershilikke tartyldy. Sondaı-aq alkogol ónimin satý erejeleri týraly QR zańnamasyn buzýdyń tórt deregi anyqtaldy. Túngi ýaqytta 118 kámeletke tolmaǵan jetkinshektiń turǵyn úıden tys jerde bolǵany úshin 106 zańdy ókil jaýapkershilikke tartyldy»,-deıdi Q.Qaljanov.
Sondaı-aq, qosymsha 85 quqyq buzý deregi anyqtaldy.
