Jambylda meıramhana ıeleriniń arasynda jańa chellendj bastaldy
TARAZ. QazAqparat - Jambyldyq kásipkerler koronavırýs ınfektsııasymen kúres boıynsha ózekti chellendjge belsene qatysýda, dep habarlaıdy QazAqparat.
Chellendj Jambyl oblysy polıtsııa departamentiniń Instagram áleýmettik jelisinde uıymdastyrylyp jatyr.
Departamenttiń baspasóz qyzmetiniń málimetinshe, bastama qalalyq jáne aýdandyq kásipkerlerdiń bir-birine joldaǵan beınetúsirilimi arqyly órbýde.
Qalyptasqan jaǵdaıǵa baılanysty óz kásibiniń turalaýyna qaramastan, kafe, meıramhana jáne oblystyń basqa da oıyn-saýyq oryndarynyń ıeleri vıdeo arqyly áriptesterin chellendjge qatysýǵa jáne koronavırýspen kúres baǵytynda engizilgen shekteýlerdi oryndaýǵa shaqyrady.
Aıtalyq, Taraz qalasyndaǵy «Ofelııa» kafesiniń dırektory áriptesteriniń shydamdylyq tanytyp, túsinistikpen qaraýǵa shaqyrady.
«Barlyq engiziletin jarlyqtar bizdiń, el turǵyndarynyń densaýlyǵyn saqtaý úshin mańyzdy. Biz olardy tıisinshe orynda saq, óz jaǵdaıymyzdy jeńildetemiz», – deıdi ol.
Ákimshiler men mekeme dırektorlarynyń pikirinshe, árbir kásipker engizilgen shekteýlerdi oryndaýǵa jaýapkershilikpen qaraýy, oryn alǵan oqıǵalardan tys qalmaýy jáne koronavırýsqa qarsy kúreske óz úlesin qosýy qajet.
Kásipkerlik chellendj - koronavırýs ınfektsııasynyń taralýyna qarsy kúreste polıtsııa qyzmetkerlerine naqty kómek.
Óz kezeginde, polıtsııa qyzmetkerleri osy baǵyttaǵy barlyq múmkindikterdi qarastyrýda. Atap aıtsaq, kúndelikti reıd uıymdastyrylyp, oblystyń barlyq dámhanalary men meıramhanalarynyń ıelerine eskertý jasalǵan. 2000-nan astam jadynama tabys etilgen.
