Jambylda medıtsınalyq qural-jabdyqtar alýǵa 1,6 mlrd teńge bólingen
TARAZ. QazAqparat – Jambyl oblysy koronavırýstyń yqtımal ekinshi tolqynyna daıyndyq ústinde, dep habarlaıdy QazAqparat tilshisi.
Monıtorıngke sáıkes, 18 qarashadaǵy jaǵdaı boıynsha oblys aýmaǵynda jalpy COVID-19 indetiniń 4272 jaǵdaıy tirkeldi, 100 myń turǵynǵa shaqqandaǵy aýrý kórsetkishi - 369,4. Pnevmonııanyń 156 jaǵdaıy tirkelgen.
Búgingi tańda oblystyq kóp beıindi balalar aýrýhanasynyń ınfektsııalyq blogynda 250 ınfektsııalyq tósek qory, onyń ishinde 25 reanımatsııalyq tósek jumys atqarýda. Bul týraly oblystyq densaýlyq saqtaý basqarmasynyń baspasóz qyzmeti habarlady.
«Derttiń órshýine baılanysty Qazaqstannyń barlyq óńirleri úsh beldeýge bólingen: qyzyl, sary jáne jasyl. Jospar boıynsha jasyl deńgeıoryn alǵanda jumyldyrylatyn tósek qory 750-ge, onyń ishinen reanımatsııalyq tósekter 75-ke deıin ulǵaıtylady. Sary deńgeı oryn alǵanda tósek qory 1 360-qa deıin, onyń ishinen reanımatsııalyq tósekterdiń sany136 quraıtyn bolady. Qyzyl deńgeı oryn alǵanda Covid-19-ben aýyratyn naýqastardy emdeý úshin ınfektsııalyq statsıonarlardaǵy tósek qory jalpy 2530-dy, onyń ishinde reanımatsııalyq tósek sany 253 bolady. Josparlanyp otyrǵan 2 530 tósek-orynǵa 3915 medıtsına qyzmetkerin tartý josparlanǵan» delingen habarlamada.
Sondaı-aq, basqarmanyń málimetinshe medıtsınalyq qural – jabdyqtar jáne medıtsınalyq maqsattaǵy buıymdardy alýǵa jergilikti bıýdjet esebinen 1,6 mlrd teńge bólingen.
Oblys boıynsha 10 kompıýterlik tomografııa jumys isteýde. Aýyr tynys alý jetispeýshiligi bar naýqastardy emdeý maqsatynda oblysqa 2 ekstrakorporaldy membrandy oksıgenatsııa apparatyn alý josparlanǵan.
Odan basqa 100 kóp fýnktsıonaldy kereýet, 4 tsıfrlyq rentgen apparaty alynýda jáne de oblystyq medıtsınalyq uıymdarǵa 4 ottegi stantsııasy ornatylady.
14 ókpeni jasandy jeldetý apparaty satyp alynǵan.
Qazirgi tańda, oblysymyzǵa Respýblıkalyq bıýdjet qarajaty esebinen 8 jyljymaly medıtsınalyq keshen jáne 18 sanıtarlyq avtokólik jetkizildi.
«Biryńǵaı dıstrıbıýtormen statsıonar sheńberinde oblystyń medıtsınalyq uıymdaryna 5,9 mlrd teńge somasyna, onyń ishinde «Tynys alý joldary aýrýy» nozologııasy jáne «Koronavırýs ınfektsııasy» nozologııasy boıynsha 137 mln teńgege dárilik zattar men medıtsınalyq buıymdar alyndy. Sondaı-aq, 1 mlrd teńgege koronavırýs ınfektsııasyn emdeýge jáne aldyn alýǵa arnalǵan dárilik zattar men medıtsınalyq maqsattaǵy buıymdar jetkizildi» delingen vedomstvo málimetinde.
Sonymen qatar, óńirdegi jasaqtalǵan tósek qorlaryna jumyldyrylǵan medıtsınalyq qyzmetkerlerden basqa qosymsha barlyǵy 280 dárigerden rezerv qurylǵan.
