Jambylda medıtsına mekemeleri koronavırýstyń ekinshi tolqynyna daıyn ba
Kezdesýge oblystaǵy densaýlyq saqtaý mekemeleriniń basshylary qatyssa. Sondaı-aq, beınekonferents-baılanys rejıminde aýdandyq aýrýhanalardyń qyzmetkerleri de qosyldy.
Basqosýda densaýlyq saqtaý basqarmasynyń basshysy Áset Qalıev densaýlyq saqtaý salasyn damytýǵa 90 mıllıardtan astam teńge baǵyttalǵanyn aıtty.
Oblystyq kópbeıindi aýrýhana bazasynda durys tamaqtaný ortalyǵy, kópbeıindi balalar aýrýhanasy bazasynda «Qamqorlyq» ońaltý ortalyǵy ashyldy.
Jedel járdem mashınalary GPS navıgatsııasymen jabdyqtalǵan. 18 reanımobıl, 8 jyljymaly medıtsınalyq keshen jáne 70 sanıtarlyq avtomobıl satyp alyndy. 1 069 079 turǵynnyń elektrondyq densaýlyq pasporty rásimdelgen.
«Jumyspen qamtýdyń jol kartasy» baǵdarlamasy aıasynda 10 densaýlyq saqtaý nysany kúrdeli jóndeýden, 4 nysan aǵymdaǵy jóndeýden ótken.
«Kóptegen jas analar ne isterin, kimge júginerin bilmeıdi. Dárigerler júkti áıelderdiń esebin júrgizip, olardyń ýaqytyly tekserýden ótýin qadaǵalaýy kerek. Osy turǵyda maǵan tsıfrlandyrýdy engizý týraly esep berildi. Demek júkti áıelder týraly barlyq málimetter qol jetimdi. Tek osy málimettermen júıeli jumysty uıymdastyrý qajet», - dep oblys ákimi Áset Qalıevke tapsyrma júktedi.
Koronavırýstyń yqtımal ekinshi tolqyny týraly aıta kele, A.Qalıev oǵan barlyq medıtsınalyq mekemelerdiń 100 paıyz daıyn ekendigine sendirdi.
«Koronavırýstyń ekinshi tolqyny kezindegi aýrýshańdyqtyń qarqyndylyǵy dárigerlerdiń jedel jumysyna baılanysty bolmaq»,- dedi aımaq basshysy.
Koronavırýstyń jaǵdaıyna baılanysty «qyzyl», «sary» jáne «jasyl» sekildi úsh deńgeı anyqtaldy. Jalpy 4000-nan astam tósek-oryn ázirlengen desek, al dári-dármektiń eki aılyq qory jasaqtalǵan. Jaz aıymen salystyrǵanda qazir medıtsınalyq jabdyqtardyń sany artqan.
Taǵy bir mańyzdy másele – medıtsına mamandardyń jetispeýshiligi. Oblysqa 194 jas maman kelse, onyń 76-sy Taraz qalasynda, 118-i aýdandarda jumysqa ornalasqan. 98 mamanǵa áleýmettik kómek kórsetilip, 15-i turǵyn úımen qamtamasyz etilgen.
«Taraz qalalyq kópsalaly aýrýhana bazasynda S.J.Asfendııarov atyndaǵy Qazaq ulttyq medıtsınalyq ýnıversıtetiniń fılıaly ashylatyn bolady. Sonyń nátıjesinde, tar beıindi mamandardyń tapshylyǵy máselesi sheshilýi tıis», - dedi oblys ákimi.