Jambylda maıdangerler ómirinen syr shertetin resmı saıt ashylady
Saıt tanystyrylymyn oblystyq mádenıet, arhıvter jáne qujattama basqarmasy basshysynyń orynbasary Sara Madıeva júrgizip, bul saıt ústimizdegi jyly oblys basshysynyń tapsyrmasymen jańǵyrtylǵan «Erlik» memorıaldyq kesheniniń jalǵasy ekenin aıtty. Saıttyń ózi 2019 jyldyń qańtar aıynan bastap iske qosylady.
2018 jyldyń 9-mamyrynda Jambyl oblysynyń ortalyǵy Taraz qalasynda ótken osy oqıǵa erteń emes búgingi kúnniń ózinde tarıhqa aınalyp otyr. 105 myń maıdangerdiń atyn tasqa qashap jazýdyń máni de, maǵynasy da zor. Bul maıdangerlerge emes, erlikti qasterleý jáne erlerdi qurmetteý úshin búgingi jáne keler urpaqqa kerek. Mundaǵy maıdangerlerdiń tizimin naqtylaýǵa muraǵatshylar kóp eńbek sińirdi.
Jambyl oblysynan 1941-1945 jyldary Uly Otan soǵysyna shaqyrylǵan jáne soǵystan keıingi jyldary osy óńirge kelip, eńbek etken, ómir súrgen azamattardyń tizimi jınaqtalyp, alǵash ret oblystaǵy arhıvısterdiń kómegimen elektrondy nusqasy daıyndaldy. Tizim tasqa qashalǵannan keıin de arhıvterge kelip ótinish jasaýshylar boldy. Búgingi kúni 705 maıdangerdiń esimin memorıaldyq keshenge qosymsha engizý úshin Taraz qalalyq ákimdigine tapsyryldy.
Óz atalaryn tizimnen kórgisi kelgen oblys jurtshylyǵynyń tileginen «Erlik.kz» aqparattyq saıtyn jasaý qajettiligi týyndady. Memorıaldyq keshende oblys jurtshylyǵy soǵysqa qatysqan áke, atalarynyń esimin ǵana kórse, bul saıtta olardyń týǵan jyly, týǵan jeri, maıdanǵa shaqyrylǵan áskerı bólim ataýy týraly qosymsha aqparat ala alady.
Sondaı-aq, oblystan tys jerde turatyn jerlesterimiz úshin memorıaldyq keshenge kele almaǵanymen, resmı saıttan týysy týraly aqparatty kórý úlken qýanysh bolary anyq.
Saıtta maıdangerlerdiń tiziminen bólek, jambyldyq Sovet Odaǵynyń Batyrlarynyń, «Dańq» ordeniniń kavalerleriniń ómirbaıandary, sýretteri men erlik joldary týraly qysqasha aqparattar kórsetilgen. Olardyń esimimen atalǵan Jambyl oblysyndaǵy aýdan, aýyl, kóshe attary da ekinshi bólimge engizildi.
«Otty jyldardyń tarıhy» bóliminde Jambyl oblysynyń memlekettik arhıv qujattary negizinde Uly Otan soǵysy taqyrybynda jaryq kórgen kitaptardyń sýretteri men annotatsııasy berilgen. Keleshekte bul kitaptardyń elektrondy nusqasyn salý da jospar da bar.
Іs-sharaǵa Uly Otan soǵysynyń ardagerleri Mútálip Erejepbaev, Ivan Fedorovıch Makeev jáne oblystyq, qalalyq ardagerler keńesiniń músheleri, oblystyq tilderdi damytý, mádenıet, arhıvter jáne qujattama basqarmalarynyń basshylary, mádenıet jáne arhıv salalynyń, qalalyq qorǵanys isteri basqarmasynyń qyzmetkerleri, buqaralyq aqparat quraldary qatysyp, saıt jobasy týraly ózderiniń oń kózqarastaryn bildirdi. Oblystyq «Aq jol» gazetiniń bas redaktory Kósemáli Sáttibaıuly saıt jumysyn odan da jetildirý maqsatynda maıdangerlerdiń estelikterin berýdi, «Erlik-TV» kanalyn júrgizýdi, baspasóz quraldarynda jaryq kórgen jýrnalısterdiń maqalalaryn da osynda jınaqtaýdy usyndy.
Tanystyrylymnan keıin Maqulbek Rysdáýlettiń bıyl shyqqan «Soldat jary» atty kitabynyń tusaýkeser rásimi ótkizildi. Rásimdi kitap avtory M.Rysdáýlet, qonaq bolyp kelgen Uly Otan soǵysynyń maıdangerleri jáne oblystyq ardagerler keńesiniń tóraǵasy E.Soltybaev, oblystyq mádenıet, arhıvter jáne qujattama basqarmasynyń basshysy D.Byqybaev júrgizip, bul kitap keleshek urpaqtyń rýhanı azyǵy bolary anyq ekenin aıtty
