Jambylda mas júrgizýshiniń kinásinen bolatyn jol apatynyń sany edáýir artqan
TARAZ. QazAqparat –Bıylǵy úsh aıda Jambyl oblysy aýmaǵynda jol-kólik oqıǵalarynyń sany 8,7 paıyzǵa tómendedi, dep habarlaıdy QazAqparat tilshisi.
Osylaısha óńirdegi jol apatynyń kórsetkishi respýblıkalyq mańyzy bar avtojoldarda 3,8 paıyzǵa, jergilikti mańyzy bar avtojoldarda 29,6 paıyzǵa jáne qalalar men eldi mekenderdiń kóshe-jol jelilerinde 6,6 paıyzǵa tómendegen.
Jalpy alǵanda joldaǵy qaýipsizdik jaǵdaıyn anyqtaıtyn negizgi faktor - júrgizýshiler men jaıaý júrginshilerdiń nemquraılyǵy.
Taldaý nátıjesi kórsetkendeı, jyl basynan beri tirkelgen 211 oqıǵanyń 209-y júrgizýshilerdiń kinásinen bolǵan.
«Máselen, respýblıkalyq kólik joldarynda júrgizilgen hronometrajǵa sáıkes, oblys aýmaǵy boıynsha táýligine 8 myńnan astam avtomobıl,onyń ishinde jeńil avtomobıl sany - 6 myń 984 jáne 1 myńnan astam aýyr júk kóligi ótedi. Qoldaǵy bar statıstıkaǵa súıensek, JKO-nyń basym bóligi júrgizýshilerdiń kinásinen jol qozǵalysy erejelerin saqtamaǵan kezde jasalady: jyldamdyq rejımin asyrý, baǵdarshamdar men jol belgileriniń sıgnaldaryn elemeý, tıisti qashyqtyqty saqtamaý, qarama-qarsy qozǵalys jolaǵyna shyǵý jáne basqalar. Alaıda, avtokólikti mas kúıinde júrgizgen júrgizýshilerdiń kinásinen bolatyn jol apatynyń sany edáýir artyp otyr» delingen oblystyq PD baspasóz qyzmetiniń habarlamasynda.
Aıta keteıik, búgingi tańda jol qozǵalysy erejelerin buzýdyń aldyn alý faktorlarynyń biri – 10 jyljymaly postty qamtıtyn «Lasso» apparattyq-baǵdarlamalyq kesheni.
Onyń kómegimen jyl basynan beri 9 671 zań buzý deregi tirkeldi.
