Jambylda mas júrgizýshi 7 jylǵa kólik júrgizý quqyǵynan aıyryldy

TARAZ. QazAqparat – Jambyl oblysynda mas júrgizýshi 7 jylǵa kólik basqarý quqyǵynan aıyryldy, dep habarlaıdy QazAqparat.

Jambyl oblysy Polıtsııa departamentiniń qyzmetkerleri Jýaly aýdany Báıterek aýylynyń aýmaǵyn patrýldeý kezinde 47 jastaǵy jergilikti turǵynnyń basqarýyndaǵy Nissan Sunny markaly avtokóligin toqtatty.

«Tekserý barysynda polıtseıler er adamnyń avtokólikti mas kúıinde basqarǵanyn anyqtady. Tártip buzýshyǵa QR ÁQBtK-niń 608-baby 1-bóligi boıynsha ákimshilik hattama toltyryldy. Kólik aıyp turaǵyna qoıyldy»,-delingen polıtsııa habarlamasynda.

Kináli júrgizýshi Jýaly aýdandyq sotynyń qaýlysymen 15 táýlikke ákimshilik qamaýǵa alynyp, 7 jyl merzimge kólik júrgizý quqyǵynan aıyryldy.