Jambylda mal urlyǵymen aınalysqan 2 qylmystyq top anyqtaldy
TARAZ. QazAqparat - Jambyl oblysynda mal urlaýdyń aldyn-alý, eskertý, jolyn kesý jáne anyqtaý maqsatynda «Mal urlyǵy» jedel-aldyn alý sharasy ótkizildi, dep habarlaıdy QazAqparat.
Úsh kúndikis-sharaǵa oblystyq Polıtsııa departamentiniń 500-den astam qyzmetkeri jumyldyryldy. Alǵashqy táýlikter ishinde mal urlyǵynyń bes faktisi jáne buryn jasalǵan uqsas qylmystyń 13 faktisi tirkelip, ashyldy. Bul týraly atalmysh departamenttiń baspasóz qyzmeti málimdedi.
«Turaqty túrde mal urlyǵymen aınalysqan 20 adam jáne eki uıymdasqan qylmystyq top anyqtalyp, tıisti esepke alyndy. Máselen, Merki aýdany Merki aýylynyń 65 jastaǵy turǵynynan jylqy urlaǵany úshin osy eldi mekenniń úsh turǵyny ustalyp, óz kinásin tolyq moıyndady. Sondaı-aq, tıisti qujattarsyz mal tasymaldaǵan 24 tulǵa ákimshilik jaýapkershilikke tartyldy»,-delingen atalmysh vedomstvonyń habarlamasynda.
Departament mamandary mal urlyǵyna qarsy kúreste quqyq qorǵaý organdary jumysynyń tıimdiligin arttyrý máselesi Jambyl oblysy Polıtsııa departamenti basshylyǵynyń turaqty baqylaýynda turǵanyn aıtady.
