Jambylda qyzmettik kólikti jeke maqsatqa paıdalanǵandar anyqtaldy

TARAZ. QazAqparat – Jambyl oblystyq Polıtsııa departamentiniń patrýldik polıtsııa batalony aǵymdaǵy jyl basynan jemqorlyq kórinisterdiń aldyn alý jáne qyzmettik avtokólikterdi jumystan tys ýaqytta paıdalanýdy boldyrmaý maqsatynda 14 reıdtik is-shara ótkizdi, dep habarlaıdy QazAqparat tilshisi.

Júrgizilgen reıdtterdiń nátıjesinde 16 tulǵa túrli tártiptik jaýapkershilikke tartyldy. Olardyń arasynda aýdan ákiminiń orynbasary, sharýashylyq meńgerýshisi, júrgizýshiler bar bolyp shyqqan. Bul týraly QR Sybaılas jemqorlyqqa qarsy is-qımyl agenttiginiń Jambyl oblysy boıynsha departamenti basshysynyń birinshi orynbasary Ravıl Tólebaev aıtyp berdi.

«2019 jyldyń 11 qazanynda «Jambyl – adaldyq alańy» jobalyq keńsesi jáne Polıtsııa departamentiniń patrýldik polıtsııa batalony qyzmetkerlerimen birlesip júrgizgen reıdtik is-shara barysynda, saǵat 22:00-de Taraz qalasynyń Abaı kóshesinde Sarysý aýdany ákimdigine tıesili «KIA» markaly avtokólik toqtatyldy. Alaıda, avtokólik júrgizip otyrǵan ákimdik qyzmetkeri S.Bıǵalıev tıisti jaýapkershilikten qutylý maqsatynda zańsyz syılyq usynǵan. Osy faktige baılanysty zańnama aıasynda tıisti sharalar qabyldaý úshin usynys joldandy»,- dedi Ravıl Tólebaev. Ol aldaǵy ýaqytta Departament bul baǵyttaǵy jumysyn kúsheıte túsetinin atap ótti.