Jambylda Qyrǵyzstanmen shekaradaǵy blok-beketten bir táýlikte 120-dan astam adam ótken

TARAZ. QazAqparat – Jambyl oblysyndaǵy Qyrǵyz Respýblıkasymen shekarada ornalasqan blok-beketten bir táýlikte 120-dan astam adam ótken, - dep habarlaıdy QazAqparat Jambyl oblysy ákimdiginiń resmı saıtyna silteme jasap.

Jambyl oblysynyń ákimi Berdibek Saparbaev «Aısha-bıbi» shekaralyq beketinde bolyp, kedendik jáne shekaralyq qyzmetterdiń, sondaı-aq Qyrǵyzstannan kelgen azamattardy tekserýmen aınalysatyn medıtsına mamandarynyń qyzmetimen tanysty. Ótken táýlikte bul beket arqyly 124 adam ótse, onyń ishinde dene qyzý bar nemese 1a, 1b, 2 jáne 3 sanattaǵy elderden kelýshiler tirkelmegen.

Oblys ákimi qaýipsizdikti qamtamasyz etý jáne densaýlyqty saqtaý boıynsha qoıylyp otyrǵan mindetterdi barynsha sapaly júzege asyrýdyń mańyzdylyǵyn atap ótip, salalyq vedomstvolar men Jambyl aýdanynyń ákimdigine birqatar tapsyrmalar júktedi.