Jambylda qylmystylyq deńgeıi 28 paıyzǵa tómendedi
TARAZ. QazAqparat – Jambyl oblysynda aǵymdaǵy jyldyń on aıynda qylmystylyq kórsetkishi 28 paıyzǵa tómendedi. Bul týraly ÓKQ ótken brıfıngte oblystyq Polıtsııa departamentiniń bastyǵy Janat Súleımenov málimdedi, dep habarlaıdy QazAqparat tilshisi.
Jalpy óńirde qylmys sany 28 paıyzǵa azaıǵan desek, bul oraıda urlyq, onyń ishinde qalta jáne uıaly telefondar, zorlaý, qaraqshylyq shabýyldar, mal urlyǵy, tonaý jáne buzaqylyqtar sany azaıǵandyǵy baıqalady.
«Qabyldanǵan sharalardyń nátıjesinde kámeletke tolmaǵandardyń qatysýymen jasalǵan qylmystar sany 34 paıyzǵa azaıdy. Sondaı-aq kámeletke tolmaǵandarǵa qatysty jasalǵan qylmystar 25 paıyzǵa, onyń ishinde olardyń jynystyq qol suǵýshylyǵyna baılanysty qylmystar 33 paıyzǵa qysqardy. Budan bólek, JKO, qaıtys bolǵandar men jaralanǵandar sany 27 paıyzǵa azaıǵan»,-deıdi Janat Súleımenov.
Departament basshysy azamattardyń qaýipsizdigin qamtamasyz etý jáne qylmysqa qarsy kúres sııaqty óziniń negizgi mindetterin oryndaýmen qatar, polıtsııa qyzmetkerleri karantındik is-sharalardy qamtamasyz etýge tartylǵandyǵyn atap ótti.
«Oblys boıynsha 51 mobıldi top quryldy, onyń quramynda polıtsııa qyzmetkerleri de bar. Olarmen 11 myń 250 nysandy tekserip, 656 quqyq buzýshylyq anyqtalǵan. 368 derek boıynsha SES qyzmetkerleri 45,5 mln teńge somasyna aıyppul salǵan»,-deıdi J.Súleımenov.
