Jambylda qujaty joq mas júrgizýshi polıtseılerden qashyp qutylmaq boldy
TARAZ. QazAqparat – Jambyl oblysynda júrgizýshi kýáliginen aıyrylǵan mas júrgizýshi polıtsııadan qashyp qutylmaq boldy, dep habarlaıdy QazAqparat óńirlik polıtsııa departamentiniń baspasóz qyzmetine silteme jasap.
Aıta keteıik, 2020 jyldyń 11 qańtarynda kúshine engen jańa zań boıynsha mas kúıinde kólik júrgizgenderge jaza kúsheıdi. Jambyl oblysynda mundaı fakti birinshi ret Shý aýdanynda tirkeldi.
Taıaýda aýdandyq polıtsııa qyzmetkerleri buǵan deıin júrgizýshi kýáliginen aıyrylǵan 32 jastaǵy mas júrgizýshini ustady. Ol Aýdı 100 avtokóligin tizgindeý kezinde orta mólsherdegi mas bolǵan.
«Júrgizýshi polıtseılerge ustatpaı ketýge tyrysty. Sóıtip qarsy jolaqtaǵy kólikke qater tóndirdi. Degenmen, ony polıtsııa qyzmetkerleri tez-aq ustady. QR QK 346-babyna sáıkes, quqyq buzýshy avtokólik júrgizý quqyǵynan ómir boıyna aıyrylýy múmkin. Bul bap boıynsha sanktsııa 5 jylǵa deıin bas bostandyǵynan aıyrý jazasyn qarastyrady», - dep túsindirdi Jambyl oblystyq polıtsııa departamenti basshysynyń birinshi orynbasary Baýyrjan Údergenov.
Qazirgi tańda júrgizýshi ýaqytsha ustaý ızolıatoryna qamalǵan, al avtokólik aıyp turaǵynda.
