Jambylda kóshi-qon zańnamasyn buzǵan 7 sheteldik ustaldy
TARAZ. QazAqparat – Jambyl oblysynda kóshi-qon zańnamasyn buzǵan Ózbekstan jáne Qyrǵyz Respýblıkasynyń azamattaryn anyqtady, dep habarlaıdy QazAqparat.
Bul týraly oblystyq polıtsııa departamentiniń baspasóz qyzmeti aıtty.
«Aǵymdaǵy jyldyń 17 tamyzynda tártip saqshylary ruqsat berý qujatynsyz jumys istegen 5 Ózbekstan azamatyn anyqtady. Qazaqstan aýmaǵynan zańda belgilengen merzimde shyqpaǵan Qyrǵyz Respýblıkasynyń 2 azamaty 2019 jylǵy 20 tamyzda Qordaı aýdanyndaǵy ótkizý pýnktinde toqtatyldy»,-delingen vedomstvo habarlamasynda.
Aıta keteıik, jol berilgen buzýshylyqtar úshin shetel azamattary Qazaqstan Respýblıkasynyń Ákimshilik quqyq buzýshylyq týraly Kodeksinde kózdelgen jaýapkershilikke tartylǵan.
Mamandar kóshi-qon zańnamasyn buzýshylarmen kúres boıynsha aldyn alý jumystary jalǵasýda ekenin aıtady.
