Jambylda kóshi-qon zańnamasyn buzǵan 50 sheteldik jaýapqa tartyldy
TARAZ. QazAqparat – Jambyl oblysynda 50 sheteldik azamat ákimshilik jaýapkershilikke tartyldy, dep habarlaıdy QazAqparat tilshisi.
Jambyl oblysynda «Mıgrant» jedel-aldyn alý is-sharasy ótýde.
Negizgi maqsat – uzaq ýaqyt oblys aýmaǵynda zańsyz júrgen shetel azamattaryn, sondaı-aq jol júrý bıletin satyp alýda qarjylyq qıyndyqqa tap bolǵan shetel azamattaryn anyqtaý.
«Mıgrant» jedel-aldyn alý is-sharasy ótkizilgen úsh kún ishinde kóshi-qon zańnamasyn buzǵany úshin 50 sheteldik azamat ákimshilik jaýapkershilikke tartyldy.
«Máselen, Taraz qalasyndaǵy shaǵyn aýdannan Qazaqstanda jumysqa ornalasýǵa tıisti ruqsat almaı, eńbek etip júrgen Ózbekstannyń 35 azamaty ustaldy» delingen oblystyq polıtsııa departamenti baspasóz qyzmetiniń habarlamasynda.
Sondaı-aq, sheteldik azamattardyń kelýi týraly polıtsııa organdaryn ýaqtyly habardar etpegeni úshin 45 qazaqstandyq ákimshilik jaýapkershilikke tartyldy.
Aıta ketý kerek, Qazaqstannyń «Halyqtyń kóshi-qony týraly» zańyna sáıkes, qabyldaýshy tulǵalar ózderine keletin sheteldikter týraly ishki ister organdaryna olar kelgen kúnnen bastap úsh jumys kúni ishinde habarlaýǵa mindetti.
