Jambylda koronavırýs juqtyrǵan júkti áıel bosandy
TARAZ. QazAqparat – Jambyl oblysynda koronavırýs juqtyrǵan 24 jastaǵy júkti áıel bosandy, dep habarlaıdy QazAqparat oblys ákimdiginiń resmı saıtyna silteme jasap.
Jambyl oblysynda 24 mamyr kúni koronavırýstyq ınfektsııanyń 33 jaǵdaıy tirkeldi.
Atap aıtqanda, Taraz qalasynda 29 oqıǵa anyqtaldy, onyń ishinde 4 jastan 41 jasqa deıingi 28 tulǵa bar. Olardyń bári buǵan deıin aýyrǵandarmen baılanysta bolǵandar.
Sondaı-aq, dert 24 jastaǵy júkti áıelden anyqtaldy, ol 23 mamyr kúni perzenthanaǵa jatqyzar aldyndaǵy josparly tekserýden ótken. Kelinshek sol kúni bosandy. Bala men ananyń jaǵdaıy qanaǵattanarlyq. Sábıdi KVI-ǵa tekserý júrgizilýde.
Budan bólek, Baızaq aýdanynyń 1966, 2004, 2017 jáne 2018 jyly týǵan tórt turǵynynan da ınfektsııa anyqtaldy.
Aǵymdaǵy jyldyń 24 mamyryndaǵy jaǵdaı boıynsha Jambyl oblysynyń aýmaǵynda koronavırýstyq ınfektsııanyń 292 jaǵdaıy tirkeldi.
Aýyrǵandardyń ishinen 171 adam saýyǵyp, dárigerlerdiń baqylaýyndaǵy úı karantınine shyǵaryldy.
