Jambylda kópqabatty 12 turǵyn úı paıdalanýǵa berildi

28 nysannyń 12-si kópqabatty turǵyn úı bolsa, 7-eýi dárigerlik ambýlatorııa, 4-eýi balabaqsha, 4-i aýyz sýmen qamtamasyz etý jáne 1 káriz júıesi.

Mereke aıasynda Jambyl oblysynda  kóppáterli 12 turǵyn úı paıdalanýǵa berildi. Onyń toǵyzy Taraz qalasynyń Súleımenov kóshesiniń sońyndaǵy jańa №15, ekeýi «Báıterek» móltek aýdandarynan berildi. Sondaı-aq, Shý qalasyndaǵy «Jetisý» turǵyn alqabyndaǵy 75 páterli kópqabatty turǵyn úı qaıta jóndeýden ótti.

 Búginde Taraz qalasyndaǵy qajetti ınfraqurylymmen qamtamasyz etilgen 462 ga jer teliminde jańa eki móltek aýdandarynyń qurylysy júrýde. Atalǵan aýdandarda «7-20-25» baǵdarlamasy aıasynda usynylatyn 480 kóp qabatty jáne 969 jeke turǵyn úı qurylystary bastalyp, aǵymdaǵy jyly 10 kóppáterli úı (800 páter), 2019 jyly - 25 úı (1 380 páter) paıdalanýǵa tapsyrylýy josparlanǵan. Jalpy, qazirgi kezde Taraz qalasyndaǵy 686 páter baǵdarlama aıasynda azamattarǵa usynylýda.

«Bas josparǵa baılanysty jańa 15-móltek aýdanda 280 kópqabatty 969 jeke turǵyn úıdiń qurylysy salynýy josparlanǵan. Búgingi kúnge «Nurly jer» baǵdarlamasynyń aıasynda 10 úıdiń qurylysy bastalyp, 9 úı qabyldandy, 10-úı qabyldanýǵa daıyndalyp jatyr. 15-móltek aýdanynyń ortalyǵy 42 gektar bolyp otyr, bul 42 gektarǵa Táýelsizdik monýmentiniń qurylysy salynatyn bolady, bul jerde Oqýshylar saraıy, kóptegen mádenı áleýmettik nysandar salynatyn bolady», deıdi oblys ákiminiń orynbasary Erkebulan Daýylbaev.      

Aıta keteıik, Táýelsizdik jyldary oblysta 1 mıllıon 420 myń sharshy metr baspana el ıgiligine berilgen. Osy jyldyń ózinde baspanaǵa 7 mıllıard teńge jumsalyp, 440 myń sharshy metr turǵyn úı salynǵan. Al, aǵymdaǵy jyly «7-20-25» kredıtteý baǵdarlamasy aıasynda ákimdik pen Ulttyq bankiniń fılıaly, baǵdarlamaǵa qatysýshy bankter arasynda birlesken is-qımyl jospary bekitildi. Ipotekalyq nesıeniń alǵashqy jarnasynyń 30 paıyzdan 20 paıyzǵa tómendeýine baılanysty, páter alýǵa múmkindigi bar azamattardyń sany 3 esege artqan.

Avtory: Ǵıbrat SEMBAI