Jambylda kópbalaly otbasylar úshin 10 jataqhana salynady
Jambyl oblysynda 8 naýryz merekesine oraı 60 otbasy baspanaly boldy. Jańatas qalasynda kópqabatty turǵyn úı qaıta jańǵyrtylyp, áleýmettik az qamtylǵan, kópbalaly otbasylarǵa berildi. Bul úıler toqyraý jyldary ıesiz bos qalǵan. Memleket olardy kezekpen jóndep, el ıgiligine jaratyp jatyr.
Búgin Gúlaıym Tilepbergenovanyń qýanyshynda shek joq. Kópbalaly ana birneshe jyldan beri jaldamaly páterde turyp kelgen. Ol 7 jyl buryn kezekke turyp, Halyqaralyq áıelder merekesinde armanyna qol jetkizdi.
«Osy ýaqytqa deıin páter jaldap turdyq. Aıyna keıde 10 myń, keıde 15 myńnan tóledik. Mine, kezekte turǵanyma 7-8 jyl boldy. Búgin qýanyshty sátimiz keldi. Úsh bólmeli páterge qolymyz jetti», - deıdi Gúlaıym Tilepbergenova.
90-jyldary shaǵyn qaladaǵy 100-den astam kópqabatty turǵyn úı, myńdaǵan páter bos qalǵan edi. Táýelsizdik alǵan jyldardan beri bul úıler tehnıkalyq saraptamadan ótkizilip, jaramsyzy súrilip tastaldy. Al jaramdy degen 16 úı jylda shetinen jóndelip, el ıgiligine berilip jatyr. Qurylysshylardyń aıtýynsha, bul jańa úıdi salǵannan góri ekonomıkalyq jaǵynan áldeqaıda tıimdi. Máselen, jańa úıdi bastan-aıaq salyp turǵyzý úshin 700 mıllıon teńgedeı qajet bolsa, bul úılerdi qaıta jańǵyrtý memleketke 300 mıllıon teńgege aınalady.
Qazir aımaq boıynsha 24 myńǵa jýyq adam páter kezeginde tur. Bul máseleni sheshý baǵytynda «Nurly jer» baǵdarlamasy aıasynda byltyr 1673 páter paıdalanýǵa berilip, 4 myńnan astam jer ýchaskesine ınjenerlik-kommýnıkatsııalyq ınfraqurylym tartyldy.
«Nurly jer» baǵdarlamasyna sáıkes, 2019 jyly 28 úı beriledi. Bireýi ótpeli joba. Sonyń ishinde altaýy - jalǵa beriletin úıler. 21-i - ózimizdiń nesıege beriletin úıler», - deıdi obyls ákiminiń birinshi orynbasary Bekbolat Orynbekov.
Sondaı-aq aımaqta az qamtylǵan jáne kópbalaly otbasylarǵa arnaıy 10 jataqhana salynatyn boldy. Onyń altaýynyń qurylysy bıyl bastalady. Tarazda úsheýi, qalǵandary Shý, Qarataý, Jańatas qalalarynda boı kóteredi. Munda baspanaǵa muqtaj 400-ge jýyq otbasy kezegi kelgenge deıin ornalastyrylady.
