Jambylda kóktemgi dala jumystaryna 7,1 myń tehnıka jumyldyryldy

Óńirlik kommýnıkatsııalar qyzmeti alańynda ótken brıfıngte osylaı degen oblystyq aýyl sharýashylyǵy basqarmasynyń basshysy Qaırat Amanov kóktemgi dala jumystaryna daıyndyq barysy týraly aıtyp berdi.

Basqarma basshysynyń aıtýynsha, 398,3 myń gektarǵa dándi jáne dándi burshaqty daqylda egiledi. Sonymen qatar, qant qyzylshasy 5,0 myń, maıly daqyldar 60,1 myń, kókónis-baqsha daqyldary 54,9 myń gektarǵa egilmek. Al 11,5 myń gektarǵa kartop, 229,5 myń gektarǵa mal azyǵy daqyldaryn ornalastyrý josparlarynda. Eginniń jaýy – shegirtkege qarsy sharalar da qabyldanǵan. Oblys boıynsha bıyl úıirli jáne saıaq shegirtkelerge qarsy jalpy 67 130 gektar alqapqa hımııalyq óndeý jumystary júrgiziledi.

«2021 jyldyń ónimine jalpy kúzdik daqyldar 165,5 myń gektarǵa ornalasty. Óńdelýge jatatyn 432,5 myń gektar egistik jerdiń, 60,1 myń gektar óńdelip, búginde 13,9 paıyzdy qurap otyr. Qosymsha kóktemgi jer jyrtý jumystary 69,5 myń gektarǵa josparlanyp, búgingi kúnge naqty 29,5 myń gektar jyrtylyp, 42,5 paıyzdy qurady. Sonymen qatar, 28,6 myń gektar jazdyq masaqty dándi daqyldar sebilip, jospardyń 13,3 paıyzy oryndaldy»,- deıdi Qaırat Amanov.

Óńirde bıylǵy kóktemgi dala jumystaryna 7,1 myń danadan astam aýyl sharýashylyǵy tehnıkalary jumyldyrylýda. Al, el Úkimeti tarapynan oblystyń kóktemgi naýqanǵa 11,5 myń tonna kepildendirilgen dızel otyny bólingen. Búgingi kúnge josparlanǵan 5,9 myń tonnanyń 5,7 myń tonnasyna qarjy aýdarylyp, operatorlar tarapynan 4,8 myń tonnasy sharýashylyqtarǵa taratylýda.

Aıta keteıik, bıylǵy jyldyń ónimine egiletin jazdyq daqyldarǵa qajetti 72,5 myń tonna tuqym tolyǵymen daıyn. Sý tapshylyǵyn azaıtý maqsatynda aǵymdaǵy jyly sý únemdeý tehnologııalaryn 40,0 myń gektarǵa engizý josparlanýda. Al, egis alqaptaryn arzandatylǵan mıneraldy tyńaıtqyshtarmen qamtamasyz etý úshin jergilikti bıýdjetten 1,035 mlrd. teńge bólingen. Búginde 30,0 myń tonna mıneraldy tyńaıtqyshtardy aýyl sharýashylyǵy alqaptaryna paıdalanylmaq.