Jambylda qoǵamdyq oryndarda jasalatyn qylmys sany azaıǵan
Oblystyq polıtsııa departamenti bastyǵynyń orynbasary Nurjan Qalmetov alty aıdyń qorytyndysy boıynsha tirkelgen qylmystar sany 1,8 paıyzǵa tómendegenin habarlady. Atalmysh kezeńde 60-tan astam jedel-profılaktıkalyq is-shara ótkizilgen. Qoǵamdyq oryndar men kóshelerdegi qylmys sany azaıǵan.
Saparbaev ınternet-alaıaqtyqtyń kúrt óskenin atap ótip, bul máseleni baqylaýda ustap, quqyqtyq tártipti qamtamasyz etý boıynsha qosymsha shara qabyldaýdy tapsyrdy.
Kezdesý barysynda qoǵamdyq qaýipsizdik pen quqyqtyq tártipti qamtamasyz etýdiń basqa da ózekti máseleleri talqylandy.
«Vedomstvoaralyq komıssııanyń ótken otyrystary barysynda aýdan ákimderine ár aýylda ýchaskelik ınspektor taǵaıyndaý, ony turǵyn úımen qamtamasyz etý, polıtsııa qyzmetkeriniń sol aýylda turýy, turǵyndarmen tyǵyz qarym-qatynas jasaýy tapsyrylǵan bolatyn. Oǵan senip tapsyrylǵan aımaqtaǵy tynyshtyq pen tártip ýchaskelik polıtsııa qyzmetkeriniń jumysyna baılanysty. Barlyq ýchaskelik ınspektorlar avtokólikpen qamtamasyz etilgen. Biraq olardyń barlyǵy qyzmet orny boıynsha turyp jatqan joq. Bul máseleni ýaqyt sozbaı sheshý qajet», - dep Berdibek Saparbaev aýdan ákimderinen talap qoıdy.
Budan soń oblystyq polıtsııa departamenti jergilikti polıtsııa qyzmeti basqarmasynyń bastyǵy Rahymberdi Ashkeev baıandama jasady. Ol jol-kólik oqıǵalarynyń óskenin habarlady. Apattyń negizgi sebepteriniń biri –jyldamdyqty arttyrý.
Berdibek Saparbaev jol qaýipsizdigin qamtamasyz etý úshin baqylaý beınekameralaryn ornatý, joldardyń sapasyn jaqsartýdyn mańyzdylyǵyn atap ótti. Bul mindetter polıtsııa departamenti men «QazAvtoJol» UK» AQ oblystyq fılıalyna júktelgen.
«Tarazda júrgizýshiler kólikterin jol boıyna qoıyp ketýdi ádetke aınaldyrǵan. Durys turaqtamaǵany úshin tártip buzýshylardy jaýapkershilikke tartý kerek», - dep atap ótti oblys ákimi.