Jambylda qazaq pen qyrǵyzǵa ortaq ózender boıynda 3 sý qoımasy salynady

NUR-SULTAN. QazAqparat – Jambyl oblysy aýmaǵynda transshekaralyq ózender boıynda sý qoımasyn salý máselesi Úkimettiń erekshe baqylaýynda. Bul jaıynda QR Premer-Mınıstri Álıhan Smaıylovtyń Senat depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.

«Jambyl oblysy aýmaǵynda transshekaralyq ózender boıynda sý qoımalaryn salý qajettigi («Aqmola», «Qalǵuty», «Yrǵaıty») - sýdy únemdi paıdalaný esebinen ónimdilikti arttyrý jónindegi strategııalyq mindetti iske asyrýdaǵy 2021-2025 jyldarǵa arnalǵan «Jasyl Qazaqstan» ulttyq jobasy is-sharalarynyń biri. Joba boıynsha 2022 jylǵa arnalǵan respýblıkalyq bıýdjetti naqtylaý aıasynda jobalyq-smetalyq qujattamasyn ázirleýge 243,4 mln teńge somasyna tıisti bıýdjettik ótinim qaralyp jatyr» dep atap ótedi Úkimet basshysy.

Onyń aıtýynsha, joǵaryda kórsetilgen jobalardy iske asyrý óńirdegi aýyl sharýashylyǵy daqyldarynyń ónimdiligin arttyrýǵa jáne tutastaı alǵanda azyq-túlik qaýipsizdigin qamtamasyz etýge baǵyttalǵanyn eskere otyryp, málimdelgen shyǵystar bıýdjet zańnamasynyń talaptaryna sáıkes basym tártippen qaralady.

«Jalpy Jambyl oblysy aýmaǵynda transshekaralyq ózender boıynda sý qoımasyn salý máselesi Úkimettiń erekshe baqylaýynda»,- dedi Álıhan Smaıylov.