Jambylda qarý men jalǵan aqsha aınalymyn uıymdastyrýshy ustaldy

TARAZ. QazAqparat - Ulttyq qaýipsizdik komıteti Jambyl oblysynyń aýmaǵynda qarýdyń jáne jalǵan shetel valıýtasynyń zańsyz aınalymynyń jolyn kesýge baǵyttalǵan arnaıy operatsııa ótkizdi, dep habarlaıdy QazAqparat.

Vedomstvonyń málimetinshe, qylmystyq qarý men jalǵan AQSh dollaryn satýdyń jasyryn arnasy jumysyn jolǵa qoıǵan qylmystyq is-árekettiń uıymdastyrýshysy ustaldy.

«Operatsııa aldynda uzaq ýaqyt jedel zerdeleý jumysy júrgizilip, atqysh qarý, oq-dári, sonymen qatar jalǵan amerıkalyq banknottardy ákelýdiń turaqty qylmystyq júıesi anyqtaldy jáne qujattandy.

Qylmyskerler jasyryný sharalaryn qatań saqtap, zamanaýı tehnıkalyq baılanys quraldaryn qoldanýy olardyń áreketin áshkereleýde qıyndyq týdyrǵan.

Kúdiktiniń zańǵa qaıshy áreketi elimizdiń qoǵamdyq-ekonomıkalyq qaýipsizdigine qater tóndirgen.

Der kezinde qabyldanǵan sharalar nátıjesinde qylmystyq bıznes joıyldy», - dep jazdy Ulttyq qaýipsizdik komıtetinen.

Zańsyz aınalymnan 4 qarý: «Kalashnıkov» avtomatynyń jetildirilgen túrleri, tirkelmegen tegis uńǵyly myltyqtar, 450-den astam oq-dári jáne asa iri kólemde jalǵan AQSh dollary alyndy.

Ustalǵan adam qylmysyn moıyndady jáne QR QPK 128-baby negizinde sot ruqsatymen 2 aıǵa tergeý ızolıatoryna qamaldy.

Jedel-tergeý is-sharalary jalǵasýda.