Jambylda karantın talaptaryn buzǵandarǵa 31 mıllıon teńgege jýyq aıyppul salynǵan

TARAZ. QazAqparat – Jambyldyq polıtseıler karantındik talaptardy buza otyryp jasalynǵan kezekti toıdy toqtatyp, qonaqtardy taratty, dep habarlaıdy QazAqparat tilshisi.

Tarazdaǵy oıyn-saýyq mekemelerinde sanıtarlyq normalardyń saqtalýyn tekserý kezinde mobıldi toptar oıyn-saýyq mekemeleriniń saǵat 23:00-den keıin qyzmet kórsetýi, betperde jáne áleýmettik araqashyqtyq rejıminiń saqtalmaýy, adamdardyń kóp jınalýy sekildi buzýshylyqtardy anyqtady.

Máselen, 60-tan astam qonaqtyń qatysýymen ótip jatqan toıdy Taraz qalasynyń polıtsııasy toqtatty. Oǵan kelgen qonaqtardyń jasy 5-73 aralyǵynda. Polıtsııa qyzmetkerlerin kórgen qonaqtar toı ıelerimen qoshtaspastan, qasha bastaǵan. Barlyq qonaqtarmen túsindirýler júrgizilip, uıymdastyrýshylarǵa qatysty ákimshilik hattama jasalǵan.

«Jambyl oblysynda karantındik shekteýler áli de saqtalyp otyr, degenmen turǵyndar sanıtarlyq talaptarǵa beı-jaı qaraýda. Turǵyndardy saqtyq sharalaryn saqtaýǵa jáne jaqyndarynyń ómiri men densaýlyǵyna qaýip tóndirmeýge shaqyramyz», - dep atap ótti departament.

Jyl basynan beri óńirdegi túrli menshik nysandaryndaǵy tórt myńnan astam nysan reıdtik tekserýlermen qamtyldy. Reıdter barysynda karantındik rejımniń saqtalmaýy boıynsha 294 zań buzýshylyq anyqtalyp, jınalǵan materıaldar QR ÁQBtK 425-baby boıynsha ákimshilik jaýapkershilikke tartý maqsatynda Jambyl oblysy taýarlar jáne kórsetiletin qyzmetteriniń sapasyn men qaýipsizdigin qadaǵalaý departamentine joldandy. Anyqtalǵan buzýshylyqtar boıynsha jalpy somasy 30 860 885 teńgege 264 aıyppul salyndy.