Jambylda qar kóshkininen keıin ashylǵan «shuǵyl jelige» 50-den astam qońyraý tústi
ASTANA. QazAqparat -Kóksaı shatqalyndaǵy qaıǵyly oqıǵada zardap shekken áskerı qyzmetshilerge aqparattyq jáne psıhologııalyq qyzmet kórsetý úshin Jambyl oblysynda eki kún boıy «shuǵyl jeli» jumys istedi, dep habarlaıdy QazAqparat.
Jambyl oblysy boıynsha Tótenshe jaǵdaılar departamenti basshysynyń orynbasary Talǵat Sabyrov málim etkendeı, óńirlik TJD-da birden ashylǵan «shuǵyl jelige» 50-den astam qońyraý kelip túsken.
«Áskerı qyzmetishlerdiń týys-týǵandary, dostary qońyraý shalyp jatty. Zardap shekkender arasynda aty-jónderi mynadaı áskerı qyzmetshiler bar ma, jaǵdaılary qandaı, dep surap jatty. Qar kóshkini bolǵan Kóksaı shatqaly mańynda turatyn týys-týǵandarynyń qal-jaǵdaılaryn bilýge de habarlasty. Áskerı qyzmetshilerdi qutqarý boıynsha óz kómekterin usynǵan adamdar da boldy. Qońyraýlardyń túsýi tyıylǵannan keıin, qazir jeli jabyldy», - dep atap ótti T.Sabyrov.
Eske salsaq, 17 aqpan kúni Jambyl oblysynda 91678 áskerı bólimi áskerı qyzmetshileriniń jaýyngerlik daıyndyq boıynsha Kóksaı shatqalynda ótip jatqan josparly sabaǵy barysynda kútpegen jerden qar kóshkini tústi. 7 adam qaza taýyp, 16-sy zardap shekti. Kóksaı shatqalyndaǵy qutqarý jumystaryna 185 adam men 24 tehnıka jumyldyryldy.
Qaıǵyly oqıǵanyń mán-jaıyn tekserýmen jáne qaza bolǵandardyń otbasylaryna kómek kórsetý boıynsha jumystardy uıymdastyrýmen QR Qorǵanys mınıstri Sáken Jasuzaqov basshylyq etken úkimettik komıssııa aınalysýda. QR Úkimetiniń basshysy Baqytjan Saǵyntaev máseleni jeke baqylaýyna aldy.
