Jambylda qar basyp qalý qaýpi bar jol ýchaskeleri 35 shaqyrymdy quraıdy
TARAZ. QazAqparat – Jambylda qar basyp qalý qaýpi bar jol ýchaskeleri 35 shaqyrymdy quraıdy. Onyń 21 shaqyrymy Qordaı aýdanynyń, 14 shaqyrymy Jýaly aýdany aýmaǵynda,- dep habarlaıdy QazAqparat tilshisi.
Qar basyp qalý qaýpi bar atalǵan avtojol ýchaskelerinde temirbetondy qar ustaıtyn qorshaýlar ornatylǵan jáne qosymsha aǵash qorshaýlar ázirlengen. Bul týraly Jambyl oblysy TJD bastyǵy Ermek Mombaev Óńirlik kommýnıkatsııalar qyzmeti aqparat alańynda ótken baspasóz brıfınginde aıtyp berdi. Ol oblys aýmaǵyndaǵy avtomobıl joldaryn 2020-2021 jylǵy qysqy kezendegi kútip ústaýǵa daıyndyǵy týraly jan-jaqty baıandady.
«Jambyl oblysynyń jalpy paıdalanylatyn avtokólik joldarynyń uzyndyǵy 4327 shaqyrymdy quraıdy, onyń ishinde 1152 shaqyrym-respýblıkalyq mańyzy bar joldar jáne 3175 shaqyrym jergilikti mańyzdaǵy avtokólik joldary. Jalpy respýblıkalyq mańyzdy jolǵa «Qazaqavtojol» JShS fılıalynyń tarapynan barlyǵy 63 birlik tehnıkalary jumyldyrylatyn bolady. Sonymen qatar, «AraıStroıMarket» JShS-men qosymsha 12 birlik jol tehnıkasyn jalǵa alýǵa kelisimshart jasaldy. Al, jergilikti mańyzy bar joldarda 22 merdiger uıymdar qyzmet kórsetedi, olardyń teńgeriminde 196 arnaıy tehnıka bar. Jalpy, kóktaıǵaqqa qarsy sebý úshin qum, tuz materıaldary da tolyǵymen daıyn»,-deıdi spıker.
Departament bastyǵynyń aıtýynsha, aǵymdaǵy jylǵy qazan-qarasha aıynda respýblıkalyq jáne jergilikti mańyzy bar avtojoldarǵa qyzmet kórsetetin merdigerlik uıymdardyń, sondaı-aq avtojoldardyń boıynda ornalasqan 88 jylytý pýnktiniń qysqy kezeńge daıyndyǵyna arnaıy komıssııa zerdeleý júrgizilgen.
Aıta keteıik, qysqy kezeńde Jambyl oblys aýmaǵyndaǵy Kúıik, Shaqpaq, Qordaı, Hantaý asýlary úlken qaýip tóndiredi. Bul jerlerde meteorologııalyq jaǵdaıdyń nasharlaýy nátıjesinde avarııalar, avtokólikterdiń ótkizý qabiletiniń tómendeýi jáne kólik quraldarynyń jınalýy múmkin.
