Jambylda IV toqsanda 229 mektep dástúrli formatta oqıdy
TARAZ. QazAqparat – Jambyl oblysynda IV toqsanda 229 mektep dástúrli formatta oqytylatyn boldy. Bul týraly búgin ÓKQ alańynda oblystyq Bilim basqarmasynyń basshysy Gúlnar Hodjabergenova aıtyp berdi,- dep habarlaıdy QazAqparat tilshisi.
Jambyl oblysy jasyl aımaqta bolǵandyqtan, tórtinshi toqsanda oqý úrdisi dástúrli jáne aralas formatta uıymdastyrylady. Jalpy oblystaǵy 442 mektep bar desek, onda 238 682 oqýshy oqıdy. Buǵan deıin ІІІ toqsanda oqýshylardyń 51 paıyzy dástúrli formatta oqysa, 49 paıyz qashyqtyqtan bilim alǵan bolatyn.
Oqýshylar úshin pandemııa jaǵdaıynda biryńǵaı mektep formasyn kııý talap etilmeıdi. Al oqý pánderiniń 70 paıyz dástúrli formatta, qalǵan 30 paıyz qashyqtyqtan oqytylady. Olardyń qatarynda aldyńǵy toqsandaǵydaı deneshynyqtyrý, AÁD, ózin-ózi taný, kásipkerlik negizderi, kórkem eńbek pánderi bar.
«Synypta balalar sany 25-ten jáne sabaq ýaqyty 40 mınýttan aspaıdy. Mektepterde ıkemdi sabaq kesteleri jasalyp, sabaqtar arasyndaǵy úzilister ár synyp úshin ár túrli ýaqytta uıymdastyrylady. Sabaqtan tys ýaqytta 15 adamnan aspaıtyn toptarda oqýshylardy jeke oqytýǵa bolady. Kabınetter arasynda júrý, muǵalimder bólmesine barý, synyptan tys is-sharalar men ata-analar jınalystaryn ótkizý shekteledi»,-dedi G. Hodjabergenova.
Jıynda mektep túlekterin qorytyndy attestattaý jaıy da aıtyldy. Aldaǵy mamyr men maýsymda 9-synyp oqýshylary 3 emtıhan tapsyratyn bolady. Onyń ishinde oqytý tili boıynsha esse, matematıkadan (algebradan), ózge tilderde oqıtyn synyptarda qazaq tili men ádebıeti boıynsha jazbasha emtıhan jáne qazaq tilinde oqytatyn synyptardaǵy orys tili men ádebıeti boıynsha jazbasha emtıhan bolady. Al 11-synyp oqýshylary 4 emtıhan tapsyrady. Sońǵy synyp túlekterinen eki jazbasha, eki testileý alynady.
