Jambylda iri jol apaty boldy, 10 shaqty kólik soqtyǵysty
Jambyl oblysy polıtsııa departamenti baspasóz qyzmetiniń jetekshisi Gúlsara Muhtarqulovanyń málimetinshe, órt jol qozǵalysyna kedergi keltirgendikten, avtokólikter toqtatylǵan.
«Artynsha, saǵat 03.40 kezinde janyp jatqan tirkemege 550-600 metr jetpeı, DAF júk kóligi jolda bir baǵytta toqtap turǵan 10 kólikti qaǵyp ketti. Onyń ishinde eki jolaýshylar avtobýsy, eki «Toıotamı Kamrı«, «Aýdı 100«, «Shevrole Kobalt«, « Daımler Kraısler«, BMW X5, «Toıota Alfard«, «Audi 80« jeńil kólikteri boldy. Soqtyǵysýdan keıin 4 avtokólik órtendi. Saldarynan «Toıota Kamrı« avtokóliginiń jolaýshysy oqıǵa ornynda kóz jumdy, 9 adam túrli jaraqattarmen qalalyq aýrýhanaǵa jetkizildi, onyń ishinde 3 adam reanımatsııa bólimine jatqyzyldy», - deıdi vedomstvo ókili.
Atalǵan derek boıynsha QK 345-baby 3-bóligi boıynsha sotqa deıingi tergeý bastalǵan, qajetti saraptamalar taǵaıyndalǵan.
«Polıtseıler aldyn alý sharalaryn júrgizip-aq jatyr, alaıda júrgizýshiler jol qozǵalysy erejelerine mán berer emes. Áıtpese, osy atojoldyń 554-shaqyrymynda «Júk kólikteriniń qozǵalysyna tyıym salynady« degen jol belgisi tur, ıaǵnı Kúıik asýy arqyly túsýge tyıym salynǵan. Alaıda júk kólikteriniń júrgizýshileri jol belgileri talaptaryn elemeıdi, bul osy sekildi qaıǵyly jaǵdaılarǵa ákeledi», - dep atap ótti G.Muhtarqulova.
Osy oqıǵaǵa baılanysty Jambyl oblysy ákimdiginiń densaýlyq saqtaý basqarmasy 12 adamnyń zardap shekkenin habarlady. Onyń 2-ýi jolda ótip bara jatqan avtokólikpen Jýaly aýdandyq aýrýhanasyna, 10-y Taraz qalalyq kópbeıindi aýrýhanasyna jetkizilgen.
«Jýaly aýdandyq ortalyq aýrýhanasynyń jetkizilgen 2 adamǵa medıtsınalyq kómek kórsetilip, úılerine jiberildi. Al qalalyq kópbeıindi aýrýhanasyna túsken 10 adamnyń 3-eýi Ózbekstan azamattary. Zardap shekkenderdiń ishinen 5 naýqas aýrýhanaǵa jatqyzyldy. 4-eýi – reanımatsııa bólimshesine, 1 azamat – travmotologııa bólimshesine jiberildi. 5 naýqas ambýlatorlyq em qabyldaýǵa úılerine qaıtaryldy», - deıdi basqarmanyń baspasóz qyzmetkeri Tolqyn Ómirbaeva.
Ol da 1 adamnyń oqıǵa ornynda qaıtys bolǵanyn rastady.
Jalpy, statsıonarǵa jatqyzylǵan naýqastardyń barlyǵy qajetti dári-dármektermen jáne medıtsınalyq buıymdarmen qamtamasyz etilgen. Medıtsınalyq kómek kórsetýge 5 tehnıka, 15 medıtsınalyq qyzmetkerler jumyldyryldy.
Aıta keteıik, jyl basynan beri jambyldyq polıtsııa qyzmetkerleri 315 jol belgisin ornatty, 2 436 shaqyrym jol tańbasyn, 8 475 sharshy metr shuńqyr jóndeldi, 11 jol býferin, 1 034 sıgnal baǵanalaryn jáne 4 056 katafotty aýystyrdy, 1072 metr zaqymdalǵan brýstardy teńestirdi.